الماتى اكىمى اۋەزوۆ اۋدانىنىڭ تۇرعىندارىمەن كەزدەستى

ەربولات دوسايەۆ حالىقپەن 24 كەزدەسۋ وتكىزەدى. 

الماتى اكىمى ەربولات دوسايەۆتىڭ حالىقپەن ءۇشىنشى كەزدەسۋى اۋەزوۆ اۋدانىندا ءوتتى. ءىس-شاراعا اۋداننىڭ 500-دەن استام تۇرعىنى كەلدى، دەپ حابارلايدى Almaty-akshamy.kz.  

«وسى مۇمكىندىكتى پايدالانا وتىرىپ، اۋدانىمىزدىڭ قۇرىلعانىنىڭ 50 جىلدىق مەرەيتويىمەن شىن جۇرەكتەن قۇتتىقتاعىم كەلەدى! اۋەزوۆ اۋدانى 1 شارشى مەترگە 13،1 مىڭ تۇرعىن ورنالاسقان ءارى جالپى قالالىق كورسەتكىشتەن 4،5 ەسە كوپ الماتىنىڭ ەڭ تىعىز قونىستانعان اۋدانى بولىپ تابىلادى.ساۋدا وبەكتىلەرىنىڭ جەتكىلىكتىلىگى مەن جاقىندىعى جانە دامىعان ينفراقۇرىلىم اۋداننىڭ الەۋمەتتىك-ەكونوميكالىق جاعىنان سەرپىندى دامۋىنا ىقپال ەتەدى»، - دەدى ەربولات دوسايەۆ ءوزىنىڭ سوزىندە. 

الماتى اكىمىنىڭ مالىمەتىنشە، جىل باسىنان بەرى ينۆەستيسيا مەن سالىق كولەمى وسكەن. اۋداندا شاعىن جانە ورتا بيزنەس بەلسەندى دامۋدا. 37 مىڭنان استام سۋبەكت جۇمىس ىستەيدى – قالانىڭ ءاربىر التىنشى شوب سۋبەكتىسى اۋەزوۆ اۋدانىندا تىركەلگەن. بيىل 4،5 مىڭ جاڭا جۇمىس ورنىن اشۋ جوسپارلانۋدا، ونىڭ 3،3 مىڭى جۇمىسپەن قامتۋ ورتالىعى ارقىلى جۇمىسقا ورنالاستىرىلادى. 

بايانداماسىنىڭ بارىسىندا ەربولات دوسايەۆ «الماتى جاستارى» قالالىق باعدارلاماسى بويىنشا وتىنىمدەردى قابىلداۋدىڭ باستالاتىن كۇنىن جاريالادى. ولاردى اعىمداعى جىلدىڭ 18 مامىرىنان 1 ماۋسىمىنا دەيىن قابىلداي باستايدى. باعدارلاما اياسىندا قاتىسۋشىلارعا باستاپقى جانە قايتالاما تۇرعىن ءۇي ساتىپ الۋ ءۇشىن 18 ملن تەڭگەگە دەيىنگى سوماعا 5%-بەن جەڭىلدىكتى زاەمدار بەرىلەدى. باستاپقى جارنا-قارىز سوماسىنىڭ 10%-ى، نەسيەلەۋ مەرزىمى – 25 جىلعا دەيىن. 

حالىقپەن كەزدەسۋ بارىسىندا الماتى اكىمى اۋداننىڭ نەگىزگى پروبلەمالىق ماسەلەلەرىن اتاپ ءوتتى، ونىڭ ىشىندە الەۋمەتتىك ينفراقۇرىلىممەن، ينجەنەرلىك جەلىلەرمەن قامتاماسىز ەتۋ، قالانى اباتتاندىرۋ، سينتەتيكالىق ەسىرتكىلەردىڭ تارالۋى جانە ت. ب. 

الەۋمەتتىك نىسانداردىڭ جەتىسپەۋشىلىگى ماسەلەسىن شەشۋ ءۇشىن جاڭا مەديسينالىق مەكەمەلەردىڭ، مەكتەپتەر مەن بالاباقشالاردىڭ قۇرىلىسى جالعاسادى. قۇرىلىس سالۋشىلارمەن جاسالعان مەموراندۋم اياسىندا 2 جاڭا مەملەكەتتىك مەكتەپ سالۋ جانە 400 ورىندى 1 جەكە مەكتەپ اشۋ جوسپارلانۋدا (4 شاعىن اۋدانى 11 ۇيدەگى مەكەنجاي بويىنشا «دوستىق» جەكە مەكتەبى). جاقىن ارادا 1960 جىلى سالىنعان №72 اپاتتى مەكتەپتىڭ ورنىنا 1 200 ورىندى جاڭا مەكتەپ سالۋ ءۇشىن قوسىمشا جەر ۋچاسكەلەرى ساتىپ الىناتىن بولادى. 

جەكە ينۆەستيسيالار ەسەبىنەن ورىن تاپشىلىعىن قىسقارتۋ ماقساتىندا 800 ورىندى 10 جەكەمەنشىك بالاباقشا اشۋ جوسپارلانۋدا، سونداي-اق، التىن بەسىك شاعىن اۋدانىندا 120 ورىندى جاڭا قالالىق بالاباقشا قۇرىلىسىنىڭ جوبالىق-سمەتالىق قۇجاتتاماسى ازىرلەنۋدە. 

قالا باسشىسىنىڭ تاپسىرماسى بويىنشا 10-شى شاعىن اۋداندا تاعى ءبىر 280 ورىندى بالاباقشا سالۋ ءۇشىن جەر ۋچاسكەسى ساتىپ الىندى. سونىمەن قاتار، جەكە ينۆەستيسيالار ەسەبىنەن 800 ورىندى 10 جەكەمەنشىك بالاباقشا اشۋ جوسپارلانۋدا. 

حالىققا ساپالى مەديسينالىق قىزمەت كورسەتۋدى قامتاماسىز ەتۋ ماقساتىندا اعىمداعى جىلى مامىر-1 شاعىن اۋدانىندا اعىمداعى جىلدىڭ ماۋسىم ايىندا اۋىسىمىنا 200 كەلۋشىگە ارنالعان بەس قاباتتى وتباسىلىق-دارىگەرلىك امبۋلاتوريانىڭ قۇرىلىسى باستالادى. قۋانىش ش/ا اۋىسىمىنا 500 كەلۋشىگە ارنالعان ەمحانا سالۋ ۋچاسكەسى انىقتالدى. 

حالىقپەن كەزدەسۋ بارىسىندا قالا باسشىسى 1960-1970 جىلدارى سالىنعان اۋداننىڭ ينجەنەرلىك ينفراقۇرىلىمى جاڭعىرتۋدى قاجەت ەتەتىنىن اتاپ ءوتتى. قازىرگى ۋاقىتتا «دوستىق» شاعىن اۋدانى جانە ارىچنايا، ىقىلاس، زاپادنايا كوشەلەرىنىڭ قيىلىسىندا سۋ بۇرۋ جەلىلەرىن سالۋ ءۇشىن 2 جوبا بويىنشا جوبالاۋ-سمەتالىق قۇجاتتاما ازىرلەنۋدە. سونىمەن قاتار،  مامىر-4 شاعىن اۋدانى مەن «ساين-شالياپين-جاندوسوۆ-قارعالى» وزەنى كوشەلەرىنىڭ قيىلىستارىندا سۋمەن جابدىقتاۋ جانە سۋ بۇرۋ جەلىلەرىنىڭ قۇرىلىسىنا جسق ازىرلەۋگە قاتىستى 2 جوبا بويىنشا كونكۋرستىق راسىمدەر بىرمەزگىلدە وتۋدە. قۇرىلىس-مونتاج جۇمىستارى 2023 جىلى باستالادى. 

سونداي-اق، الماتى اكىمى كولىك اعىندارىن وڭتايلى ەتۋ ءۇشىن كولىك ينفراقۇرىلىمىن دامىتۋ جوسپارلارىن ۇسىندى. ماۋسىم ايىندا مەتروپوليتەننىڭ 2 ستانسياسى – «سارى-ارقا» جانە «مومىش ۇلى» ىسكە قوسىلادى. 

«بۇگىندە تولە بي كوشەسىن ۇزارتۋ بويىنشا جۇمىستار جۇرگىزىلۋدە، ول ءۇشىن اكىمدىك 270 جەر ۋچاسكەسىن بوساتۋى قاجەت، ونىڭ ىشىندە ءبىز 63 ۋچاسكە بويىنشا ساتىپ الۋ باعاسى بويىنشا كەلىستىك جانە 207 ۋچاسكە بويىنشا كەلىسسوزدەر جۇرگىزىپ جاتىرمىز. بۇل وتكەن جىلى اشىلعان اباي داڭعىلىنداعى مومىش ۇلى كوشەسىنەن باتىس باعىتتاعى التى جولاقتى ۋچاسكەمەن بىرگە ءبىزدىڭ مەگاپوليستەگى كولىك اعىندارىن وڭتايلى تۇردە قايتا بولۋگە جانە ىرگەلەس جاتقان ماگيسترالدىق كوشەلەردەگى كولىك جۇكتەمەسىن ازايتۋعا مۇمكىندىك بەرەدى»، – دەدى الماتى اكىمى. 

جايلىلىق جاساۋ جانە قالانى اباتتاندىرۋدى جاقسارتۋ ماقساتىندا 2019 جىلدان باستاپ الماتىدا «حالىقتىڭ بيۋدجەتكە قاتىسۋى» جوباسى ىسكە اسىرىلۋدا. بيىلعى جىلى تۇرعىنداردىڭ ۇسىنىستارى بويىنشا سكۆەرلەردى، جاياۋ جۇرگىنشىلەر ايماقتارىن جوندەۋ، بوس جاتقان ۋچاسكەلەردى اباتتاندىرۋ بويىنشا 23 جوبا ايقىندالدى، 191 اۋلا اۋماعىن كۇردەلى جوندەۋ جوسپارلانۋدا. 

سونداي-اق، اعىمداعى جىلى سايران كولىن اباتتاندىرۋ، سونىڭ ىشىندە كولدىڭ ءتۇبىن تازارتۋ جانە جاعالاۋ ايماعىن كوگالداندىرۋ جۇمىستارى جوسپارلانعان. بۇگىندە بوگەتتەرگە كوپفاكتورلى تەكسەرۋ جۇرگىزىلدى، وڭ قورىتىندى بار، ءتۇبىن تازارتۋ بويىنشا جوبالاۋ-سمەتالىق قۇجاتتاما مەملەكەتتىك ساراپتامادان وتۋدە (مەرزىمى – ا.ج. شىلدە ايى). 

تۇرعىنداردىڭ قاۋىپسىزدىگىن قامتاماسىز ەتۋ جانە ەسىرتكى قىلمىستارىنىڭ جولىن كەسۋ ءۇشىن اۋداندا 457 كامەرا ورناتىلادى، ونىڭ ىشىندە 87ء-سى اۋلالاردا، 202ء-سى ساياباقتاردا، الەۋمەتتىك نىسانداردىڭ جانىندا. 

الماتى اكىمىمەن كەزدەسۋ بارىسىندا تۇرعىندار جولداردى، كارىز جانە ەلەكتر جەلىلەرىن جوندەۋ، شىعارماشىلىق ۇيىرمەلەردى، سپورت سەكسيالارىن جانە ت. ب. جان باسىنا قارجىلاندىرۋ ماسەلەلەرىن كوتەردى. 

مەملەكەت باسشىسى قاسىم-جومارت توقايەۆتىڭ جارلىعىمەن بەكىتىلگەن حالىقپەن كەزدەسۋلەردىڭ جاڭا فورماتىنا سايكەس جىل سوڭىنا دەيىن ەربولات دوسايەۆ حالىقپەن 24 كەزدەسۋ وتكىزەدى – توقسان سايىن 8 اۋداننىڭ تۇرعىندارىمەن ءبىر-بىر كەزدەسۋ. 

ەسكە سالساق، الماتى اكىمىنىڭ حالىقپەن العاشقى كەزدەسۋى 14 ساۋىردە بوستاندىق اۋدانىنىڭ، ەكىنشىسى – 28 ساۋىردە الاتاۋ اۋدانىنىڭ تۇرعىندارىمەن وتكەن بولاتىن.