شەتەلگە ەكسپورتتالاتىن قارا مەتالل سىنىعىنىڭ كولەمى ازايدى

ەلىمىزدەگى مەتالل قالدىقتارىنىڭ باسىم بولىگى وتاندىق كاسىپورىنداردا وڭدەلەدى.

بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ كوميتەتى ءتوراعاسىنىڭ ورىنباسارى تۇرار جولماعامبەتوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا تىلشىلەر سوڭعى 30 جىلدا ەلىمىزدە قانشا توننا قارا جانە ءتۇستى مەتالل سىنىعى مەن قالدىقتارى شەتەلگە تاسىمالدانعانى تۋرالى سۇرادى. ءوز كەزەگىندە تۇرار جولماعامبەتوۆ جالپى اتالعان مەرزىم بويىنشا ناقتى مالىمەتتەردى ايتا المايتىنىن جەتكىزدى.

«مەندە ءدال ءقازىر ناقتى سوڭعى 30 جىل بويىنشا كورسەتكىشتەر جوق. قاتەلەسپەسەم، 2000-شى جىلدارداعى ەسەپ بويىنشا جىلىنا 3 ملن تونناعا جۋىق قارا مەتالل سىنىعى ەلدەن شىعارىلاتىن. ول جىلدارى بىزدە ەڭ باستى تۇتىنۋشى «ارسەلورميتتال تەمىرتاۋ» اق بولاتىن. 2008 جىلدان بەرى ءبىراز كاسىپورىن پايدا بولىپ، مەتالل سىنىقتارى مەن قالدىقتارى ىشكى نارىقتا قايتا وڭدەلە باستالدى. سوڭعى جىلدارى بىزدە 1 ملن تونناعا جۋىق مەتالل قالدىقتارى شىعارىلدى. ال قالعان 1،5-1،8 ملن تونناسى ەلىمىزدە وڭدەلىپ جاتىر»، - دەدى ۆەدومستۆو وكىلى.

بۇدان بۇرىن حابارلانعانداي، ەل اۋماعىنان قارا جانە ءتۇستى مەتالداردىڭ سىنىقتارى مەن قالدىقتارىن شىعارۋعا ۋاقىتشا تىيىم سالىندى. تۇرار جولماعامبەتوۆ رەسەيدەن دايىن مەتالل ونىمدەرى قىمبات باعاعا يمپورتتالىپ جاتقانىن ايتتى.