الماتى قالاسىنىڭ اكىمى دارحان ساتىبالدى تۇرعۇت وزال كوشەسىندە ورنالاسقان «№58 جالپى ءبىلىم بەرەتىن مەكتەپ» كمم عيماراتىنا جاپسارلاس سالىنعان قوسالقى نىساندى قايتا قۇرۋ الاڭىنا باردى.
جوبا بويىنشا مۇندا مەكتەپ جانىنان زاماناۋي وقۋ جانە سپورت ءۇي-جايى بار 576 ورىندىق قوسىمشا نىسان سالىنۋعا ءتيىس. جۇمىس 2024 جىلدىڭ شىلدەسىندە باستالدى، ال كەلىسىمشارت بويىنشا 2025 جىلدىڭ جەلتوقسانىندا اياقتالۋى كەرەك ەدى. الايدا، قۇرىلىس بەكىتىلگەن كەستەدەن ەداۋىر ارتتا قالىپ وتىر.
اكىم بالالاردىڭ وقۋعا ورنى جوق ەكەنىن، سوندىقتان جاعداي شۇعىل شەشۋدى تالاپ ەتەتىنىن اتاپ ءوتتى. مەردىگەرگە كەمشىلىكتى جويۋ ءۇشىن ەكى اپتا مەرزىم بەرىلدى. قالا باسشىسى جۇمىس بارىسىن كۇندەلىكتى باقىلاۋ جانە قاراجاتتى اشىق پايدالانۋ قاجەتتىگىن اتاپ ءوتتى.
«مەرزىمى ەكى اپتا. ءبىز جۇمىستىڭ قارقىنىن قاداعالايمىز، كۇن سايىن ماعان جاعداي تۋرالى باياندايسىزدار. نىسان مەنىڭ ءجىتى باقىلاۋىمدا. ەگەر ەشقانداي وزگەرىس بولماسا، ءبىز شارتتى بۇزامىز. مەردىگەرلەر جۇمىستى قوسالقى مەردىگەرلەرگە اۋىستىرۋدىڭ ورنىنا ءوز كۇشتەرىنە سەنۋى كەرەك»، - دەدى دارحان ساتىبالدى.
ءبىلىم باسقارماسىنا، قۇرىلىس باسقارماسىنا جانە جاۋاپتى قىزمەتتەرگە نىساندى ەرەكشە باقىلاۋعا الۋ جانە جۇمىس بارىسى تۋرالى اپتا سايىن بايانداۋ تاپسىرىلدى.
قايتا قۇرۋ اياسىندا جەرتولەسى مەن سپورت زالى بار جاڭا ءۇش قاباتتى كورپۋس سالۋ، اسحانا مەن اكت زالى بار بلوك تۇرعىزۋ، زاماناۋي ستاندارتتارعا سايكەس جۇمىس ىستەپ تۇرعان مەكتەپ ءۇي-جايلارىن قايتا جوسپارلاۋ جانە جاڭارتۋ، سونداي-اق ينجەنەرلىك جەلىلەردى، شاتىردى جانە ءورت قاۋىپسىزدىگى جۇيەلەرىن اۋىستىرۋ كوزدەلگەن.