ورتالىق كوممۋنيكاسيالار قىزمەتى الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى مەگاپوليستە جايلى قالالىق ورتا قالىپتاستىرۋ جانە ينجەنەرلىك ينفراقۇرىلىمدى جاڭارتۋ باعىتىندا جۇيەلى شارالار جۇزەگە اسىرىلىپ جاتقانىن ايتتى.
اكىمنىڭ ايتۋىنشا، 2025 جىلى الماتىدا جالپى ۇزىندىعى 49 شاقىرىم بولاتىن 11 كوشەدە كەشەندى كورىكتەندىرۋ جۇمىستارى اياقتالدى. قازىرگى ۋاقىتتا دوستىق داڭعىلىنىڭ ءال-فارابي داڭعىلىنان اباي داڭعىلىنا دەيىنگى بولىگى، سونداي-اق پۋشكين كوشەسىنىڭ گوگول كوشەسىنەن رايىمبەك باتىر داڭعىلىنا دەيىنگى ارالىعىندا كورىكتەندىرۋ جۇمىستارى جالعاسىپ جاتىر.
سىرتقى جارىقتاندىرۋ جۇيەسىن دامىتۋ مەن جاڭعىرتۋعا ەرەكشە نازار اۋدارىلىپ وتىر. قابىلدانىپ جاتقان شارالار بۇرىن جارىقتاندىرىلماعان 1 100-دەن استام اۋماقتى قامتىدى.
باعدارلاما اياسىندا 12 مىڭنان استام جاڭا جارىق شامى ورناتىلىپ، سونداي-اق 20 مىڭنان اسا ەسكى جارىقتاندىرۋ قۇرالدارى اۋىستىرىلىپ جاتىر. وسىلايشا، جىل سوڭىنا دەيىن الماتى قالاسىندا 32 مىڭنان استام جارىق شامى ورناتىلادى.
سونىمەن قاتار، 400 نىساندا ساندىك-ساۋلەتتىك جارىقتاندىرۋ جۇيەلەرى ەنگىزىلۋدە. قابىلدانعان كەشەندى شارالاردىڭ ناتيجەسىندە قالا تولىقتاي ساپالى سىرتقى جارىقپەن قامتاماسىز ەتىلەدى. بۇل باعىتتاعى جۇمىستار 2026 جىلى دا جالعاسادى.
سونداي-اق، قالا اكىمى الماتى قالاسىندا سۋمەن جابدىقتاۋ جانە كارىز جۇيەلەرىن جاڭعىرتۋ جۇمىستارى جۇرگىزىلىپ جاتقانىن مالىمدەدى. 2025 جىلى 330 شاقىرىم جاڭا سۋ قۇبىرى جەلىسى سالىندى، 60 شاقىرىم قولدانىستاعى جەلى جاڭارتىلدى. سۋ رەسۋرسىن ءتيىمدى پايدالانۋ ماقساتىندا جەكە ەسەپتەۋ قۇرالدارىن ورناتۋ جۇمىستارى كۇشەيتىلدى: جىل باسىنان بەرى 84،8 مىڭ سۋىق سۋ ەسەپتەگىشى ورناتىلىپ، قۇرىلعىلارمەن جابدىقتالۋ دەڭگەيى 67 %-دان 87 %-عا دەيىن ءوستى. بۇل سۋ رەسۋرستارىن ءتيىمدى باسقارۋ مەن شىعىندى ازايتۋعا مۇمكىندىك بەرىپ وتىر.
سونىمەن قاتار جىلۋ، ەلەكتر جانە گازبەن جابدىقتاۋ ينفراقۇرىلىمىن جاڭارتۋ اياسىندا 39 شاقىرىم جىلۋ جەلىسى قايتا جاڭعىرتىلىپ، 17 قازاندىق جاڭارتىلدى. ەلەكترمەن جابدىقتاۋ سالاسىندا 221 شاقىرىم جەلى قايتا جاڭعىرتىلدى، ونىڭ ىشىندە 115 شاقىرىمى "اجك" اق-نىڭ ينۆەستيسيالىق باعدارلاماسى ەسەبىنەن ىسكە اسىرىلدى. گازبەن جابدىقتاۋ باعىتىندا 6،5 شاقىرىم جاڭا جەلى پايدالانۋعا بەرىلىپ، تۇركسىب اۋدانىندا 4 شاقىرىمنان استام ماگيسترالدىق گاز قۇبىرىن سالۋ جۇمىستارى باستالدى"، – دەدى دارحان ساتىبالدى.