ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى شاعىن جانە ورتا بيزنەستىڭ مەگاپوليس ەكونوميكاسىنداعى زور ۇلەسىن، سونداي-اق تۋريستىك سالانىڭ دامۋىنداعى وڭ سەرپىندى اتاپ ءوتتى.
"شاعىن جانە ورتا بيزنەس الماتى ەكونوميكاسىنىڭ نەگىزگى درايۆەرى بولىپ قالا بەرەدى. بۇل سەكتور جالپى وڭىرلىك ءونىمنىڭ شامامەن 60%-ىن جانە جەرگىلىكتى بيۋدجەتكە تۇسەتىن كىرىستەردىڭ باسىم بولىگىن قامتاماسىز ەتىپ وتىر. قالاداعى ەڭبەككە قابىلەتتى حالىقتىڭ شامامەن 90%-ى، ياعني 1 ميلليوننان استام ادام شاعىن جانە ورتا بيزنەس سالاسىندا جۇمىسپەن قامتىلعان. جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 9،4%-عا ءوسىپ، 387 مىڭعا جەتتى. ال وندىرىلگەن ءونىم كولەمى 21%-عا ارتىپ، 2025 جىلدىڭ ءبىرىنشى جارتىجىلدىعىنىڭ قورىتىندىسى بويىنشا 13،2 ترلن تەڭگەگە جەتتى»، – دەدى الماتى قالاسىنىڭ اكىمى.
دارحان ساتىبالدىنىڭ ايتۋىنشا، كاسىپكەرلىكتى قولداۋ جانە ونى ودان ءارى دامىتۋ ماقساتىندا 2025 جىلى بيۋدجەتتەن 50،8 ملرد تەڭگە ءبولىنىپ، 1 مىڭنان استام جوباعا قولداۋ كورسەتىلدى. اتالعان شارالار ىسكەرلىك بەلسەندىلىكتى كەڭەيتۋگە، جاڭا جۇمىس ورىندارىن قۇرۋعا جانە قالانىڭ ەكونوميكالىق تۇراقتىلىعىن ارتتىرۋعا باعىتتالعان.
بريفينگ بارىسىندا دارحان ساتىبالدى الماتىنىڭ جەتەكشى تۋريستىك باعىتتاردىڭ ءبىرى رەتىندەگى پوزيسياسىن نىعايتىپ كەلە جاتقانىن اتاپ ءوتتى. CNN Travel نۇسقاسى بويىنشا مەگاپوليس 2025 جىلى الەمدەگى ەڭ ۇزدىك 25 تۋريستىك باعىتتىڭ قاتارىنا ەندى.
"بيىلعى 9 ايدا قالامىزعا 1،9 ملن تۋريست كەلدى، ونىڭ ىشىندە 563 مىڭ ادام – شەتەلدىك قوناقتار. كورسەتىلگەن تۋريستىك قىزمەت كولەمى 17،4%-عا ارتىپ، 82،4 ملرد تەڭگەگە جەتتى. بۇل كورسەتكىشتەر قالانىڭ تارتىمدىلىعى ارتىپ، تۋريستىك ينفراقۇرىلىمنىڭ جۇيەلى تۇردە دامىپ كەلە جاتقانىن ايقىن كورسەتەدى»، – دەپ ءسوزىن تۇيىندەدى دارحان ساتىبالدى.