ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى كولىك ينفراقۇرىلىمىن دامىتۋعا جانە قوعامدىق كولىكتىڭ ءتيىمدى جۇيەسىن قالىپتاستىرۋعا باعىتتالعان كەشەندى جوبالاردىڭ ىسكە اسىرىلىپ جاتقانىن مالىمدەدى.
اكىمنىڭ ايتۋىنشا، قالادا جول ينفراقۇرىلىمى باعىتىندا ءبىرقاتار ماڭىزدى جوبا قولعا الىنعان. بيىل سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جولايىرىق پايدالانۋعا بەرىلدى، اباي داڭعىلى ۇزارتىلىپ، قوزعالىس اشىلدى، 35 شاقىرىم جاڭا اۆتوموبيل جولى سالىندى، سونداي-اق 281 شاقىرىم جولعا ورتاشا جوندەۋ جۇرگىزىلدى. سونىڭ ناتيجەسىندە جاقسى جانە قاناعاتتانارلىق جاعدايداعى جولداردىڭ ۇلەسى 95 پايىزعا جەتتى.
سونىمەن قاتار، №7 قالالىق اۋرۋحانا مەن "سالەم" بازارى ماڭىندا ەكى كولىك توقتايتىن كەشەنىنىڭ قۇرىلىسى اياقتالدى. قوعامدىق كولىك باعىتتارىنىڭ ىڭعايلى اۋىسۋىن جانە ءوزارا بايلانىسىن قامتاماسىز ەتۋ ماقساتىندا "ساياحات" كولىك توقتايتىن توراپ اۋماعىندا جۇمىس جالعاسىپ جاتىر.
قالانىڭ قوعامدىق كولىك پاركىن جاڭعىرتۋ اياسىندا بيىل 940 گازبەن جۇرەتىن اۆتوبۋس ساتىپ الىندى، ونىڭ ىشىندە 340 بىرلىگىنە جەكە تاسىمالداۋشىلار قارجى بولگەن. سونداي-اق جەكە كومپانيالار 153 ەلەكتروبۋس ساتىپ الدى. وسى جىلى جولاۋشىلار سانى 33 پايىزعا ءوسىپ، تاۋلىگىنە 1،6 ملن جول ءجۇرۋ سانىنا جەتتى.
"قالانىڭ زاماناۋي كولىك جۇيەسىن قالىپتاستىرۋ – الماتىنىڭ نەگىزگى باسىمدىقتارىنىڭ ءبىرى. وسىعان بايلانىستى الماتى وبلىسى اۋماعىندا راديالدى جولداردى ۇزارتۋ جانە جولايىرىقتارىن سالۋ تۋرالى شەشىم قابىلداندى. بۇل جوبالار الماتى قالاسىنىڭ بيۋدجەتى ەسەبىنەن جۇزەگە اسىرىلادى. سونىڭ ناتيجەسىندە ۇلكەن الماتى اينالما اۆتوموبيل جولىمەن (ءۇاااج) كولىك بايلانىسى جەدەل ءارى اگلومەراسيانىڭ ءوزارا بايلانىسى كۇشەيەدى. سونداي-اق 2026 جىلى "قالقامان" مەترو بەكەتىن پايدالانۋعا بەرۋ جوسپارلانىپ وتىر. الداعى ءۇش جىل ىشىندە ءبىرىنشى جەلى "بارلىق" بازارىنا دەيىن جەتكىزىلەدى. قازىرگى تاڭدا مەترونىڭ ەكىنشى جانە ءۇشىنشى جەلىلەرى جوبالانىپ جاتىر. جوعارى جىلدامدىقتى برت باعىتىن دامىتۋ جالعاسادى. ءۇش جاڭا اۆتوبۋس پاركىن سالۋ جۇمىستارى باستالدى. اۆتوبۋس جۇرگىزۋشىلەرىنىڭ قاۋىپسىزدىگى مەن دەمالىسىن قامتاماسىز ەتۋ ءۇشىن 20 تۇراق-اينالۋ الاڭى سالىنادى. سونىمەن قاتار كولىككە اۋىسىپ مىنۋگە ارنالعان ءۇش توراپ قۇرىلىپ، بۇل قالا مەن قالا ماڭىن بايلانىستىراتىن ىڭعايلى اۋىسۋ نۇكتەسىنە اينالادى"، – دەدى دارحان ساتىبالدى.