الماتىدا قاڭتار وقيعاسىندا زاقىمدانعان قالا اكىمدىگىنىڭ عيماراتىن رەكونسترۋكسيالاۋ اياقتالدى.
عيماراتتى قالپىنا كەلتىرۋ جۇمىستارى مەملەكەت باسشىسىنىڭ تاپسىرماسى اياسىندا 2022 جىلدىڭ اقپان ايىندا باستالدى، دەپ حابارلايدى اlmaty-akshamy.kz.
ەستەرىڭىزگە سالا كەتەيىك، عيماراتقا ورتتەن 80% زالال كەلدى، 6 قابات پەن 4 پاۆيلون وتقا ورانعان، جەرتولەلەر ورتكە قارسى جۇيەنىڭ ىسكە قوسىلۋى مەن توناۋ سالدارىنان جوعارعى قاباتتان سۋ اعىپ، زارداپ شەكتى.
الماتى اكىمدىگى عيماراتىنىڭ تاريحي كەلبەتى ساقتالىپ، زاماناۋي تەحنولوگيا مەن قۇرىلىس ستاندارتى ەسكەرىلىپ جاڭعىرتىلدى. قاسبەتتە جۇلدىزدىڭ ورنىنا بەيبىتشىلىك تۇتاستىعىنىڭ، مەملەكەت پەن وتباسى نەگىزىنىڭ ۇلتتىق سيمۆولى بولىپ تابىلاتىن شاڭىراق بەينەلەنگەن.
رەكونسترۋكسيا كەزىندە ءبىرىنشى كەزەكتە اكىمدىك قىزمەتكەرلەرى مەن كەلۋشىلەرىنىڭ قاۋىپسىزدىگى ەسكەرىلدى. «قازقسعزي» اق ساراپشىلارى عيماراتتى سەيسميكالىق توزىمدىلىككە زەرتتەپ، ۇسىنىس ايتتى، سەيسميكالىق كۇشەيتۋ بويىنشا بارلىق ءىس-شارا تولىق كولەمدە جۇرگىزىلدى، ءورت قاۋىپسىزدىگى شارالارى ساقتالدى. عيماراتتىڭ ىشكى بەزەندىرىلۋىندە وتقا ءتوزىمدى جانبايتىن ماتەريالدار پايدالانىلدى، بۇرىن بولماعان جاڭا ءتۇتىن شىعارۋ جۇيەسى، ءورتتىڭ مەكەنجاي جۇيەسى-ەسكەرتۋ ورناتىلدى. ءورت كەزىندە ءورتتىڭ تارالۋىنا جول بەرمەيتىن ارنايى كلاپاندار اۆتوماتتى تۇردە قوسىلادى.
عيماراتتىڭ قاۋىپسىزدىك شارالارىن كۇشەيتۋ ءۇشىن عيماراتقا كىرۋدى باقىلاۋ جۇيەسى قولدانىلدى جانە وتقا ءتوزىمدى ەسىكتەر، عيماراتقا ءبىرىنشى قاباتتاردىڭ تەرەزەلەرى ارقىلى رۇقساتسىز كىرۋدى شەكتەيتىن قوسىمشا جاپقىشتار، سونىمەن قاتار ءار قاباتتا جانە پەريمەترى بويىنشا بەينەباقىلاۋ كامەرالارى ورناتىلدى. قىزمەتكەرلەردىڭ كىرۋى ءۇشىن تۋرنيكەت قۇرىلعىسىندا تانۋ جۇيەسى ورناتىلعان.
قۇرىلىس بارىسىندا ءتيىمدى ەنەرگيا تۇتىنۋ تەحنولوگياسى قولدانىلىپ، جاڭا جىلىتۋ جۇيەسىنە تولىعىمەن اۋىستىرىلدى. بارلىق ينجەنەرلىك كوممۋنيكاسيا اۆتوماتتاندىرىلعان جانە ءبىرىڭعاي ديسپەچەرلىك پۋنكتكە قوسىلعان، بۇل جۇمىستى باقىلاۋعا جانە عيماراتتىڭ ەنەرگيا تيىمدىلىگىن قامتاماسىز ەتۋگە مۇمكىندىك بەرەدى. ديسپەچەرلەر وزىق ۇلگىدەگى ستانسيانىڭ كومەگىمەن بارلىق جۇيەنى باسقارادى، توتەنشە جاعداي تۋىنداعان كەزدە جەدەل ارەكەت ەتەدى.
عيماراتتى قالپىنا كەلتىرۋدىڭ تاعى ءبىر ماڭىزدى كريتەرييى ينكليۋزيۆتى شەشىمدەردى ەنگىزۋ ارقىلى ازاماتتاردىڭ بارلىق ساناتى ءۇشىن جايلىلىق پەن كەدەرگىسىز ورتانى قامتاماسىز ەتۋ ەدى. اتاپ ايتقاندا، مۇمكىندىگى شەكتەۋلى جاندارعا ارنالعان جەدەل ساتىلار، ەلەكتر كوتەرگىشتەر، مۇگەدەكتەرگە ارنالعان جۋىناتىن بولمەلەر جانە قوزعالۋى قيىن ادامدارعا ارنالعان ارنايى قۇرىلعى – تاڭبالاۋ، پاندۋستار، شاقىرۋ تۇيمەلەرى، براۋل ءالىپبيى پايدا بولدى. اكىمدىكتىڭ ءبىرىنشى قاباتى «Open space Almaty» بولىپ قايتا جاڭارتىلدى – بۇل قابىلداۋ بولمەسى، كۇتۋ ايماعى، كەلىسسوزدەر بولمەسى، حالىقتى قابىلداۋ بولمەسى، انا مەن بالا بولمەسى، بالالارعا ارنالعان ويىن الاڭى بار قوعامدىق قابىلداۋ بولمەسى.
رەكونسترۋكسيادان كەيىن كابينەتتەردىڭ اۋدانى وزگەرمەدى. وتاندىق ءوندىرىستى قولداۋ ءۇشىن نەگىزىنەن قازاقستاندىق ءوندىرىستىڭ ماتەريالدارى، ونىڭ ىشىندە جيھاز جانە ەسىكتەر پايدالانىلدى. كابينەتتەردىڭ كونفيگۋراسياسى، ولشەمدەرى، ورنالاسۋى وزگەرىسسىز قالدى. عيماراتتا بارلىعى 700 ورىنعا ەسەپتەلگەن 360 كابينەت ورنالاسقان. نىساننىڭ جالپى اۋدانى 33 مىڭ شارشى مەتردەن اسادى. عيماراتتا 14 باسقارما مەن اكىمدىك اپپاراتى بولادى. وسىلايشا، الماتى اكىمدىگىنىڭ عيماراتى قالپىنا كەلتىرىلدى، پايدالانۋعا دايىن.