الماتىدا ۇرلىق جاساعان ازاماتتار بەينەكامەرالار ارقىلى قولعا ءتۇستى.
ساتۋشى بازاردا ساتىپ الۋشىنىڭ ءبىرى 300 مىڭ تەڭگە تۇراتىن التىن بۇيىمدارىن ۇرلاپ كەتكەندىگى تۋرالى پوليسياعا ارىزداندى. ساتىپ الۋشىنىڭ ارەكەتى بەينەباقىلاۋ كامەراسىنا ءتۇسىپ قالعان. ىزدەستىرۋ شارالارى بارىسىندا قاراعاندى قالاسىنىڭ تۇرعىنى 39 جاستاعى ج.ەسىمدى ازاماتشا ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بوتەننىڭ مۇلكىن ۇرلاۋدىڭ ەكىنشى دەرەگى ساۋدا ۇيلەرىنىڭ بىرىندە ورىن العان. وندا بەلگىسىز ادام كاسسادان 400 مىڭ تەڭگەنى ۇرلاپ كەتكەن. بەينەجازبادا ساتۋشى قىزدىڭ ۇيىقتاپ كەتكەنى كورىنەدى. جاس جىگىت وسى ءساتتى پايدالانىپ، كاسسانى اشىپ، اقشانى ۇرلاپ كەتكەن. وسى قىلمىستى جاسادى دەگەن كۇدىكپەن الماتى وبلىسىنىڭ تۇرعىنى، 25 جاستاعى س.ەسىمدى ازامات ۇستالدى»، – دەدى، جەتىسۋ اۋداندىق پوليسيا باسقارماسىنىڭ باستىعى جانىبەك شىناسىلوۆ.
سپيكەر، سونداي-اق، تەرگەۋ بارىسىندا ۇستالعان ازاماتشانىڭ وسىعان ۇقساس بىرنەشە ۇرلىق ەپيزودتارىنا قاتىسى بارىن اتاپ ءوتتى. ەكى ايىپتالۋشى دا ءوز قىلمىستارىن مويىندادى. ولاردىڭ ارەكەتتەرى ق ر قك-نىڭ 188-بابى 1-بولىگى (ۇرلىق) بويىنشا سارالانادى. ق ر قك-نىڭ 201 بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77 بابى 3ء-بولىمى، 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.