مەملەكەت باسشىسىنىڭ تاپسىرماسىنا سايكەس، الماتى قالاسىنىڭ جوعارعى بولىگىندە كوپقاباتتى تۇرعىن ۇيلەر مەن نۇكتەلى قۇرىلىس سالۋعا موراتوريي ەنگىزىلەدى. بۇل جونىندە قالالىق جوسپارلاۋ جانە ۋربانيستيكا باسقارماسى حابارلادى.
جاڭا شەكتەۋلەر تالعار تاس جولىنىڭ، ۇلكەن الماتى اينالما جولىنىڭ (ءۇااج)، ءال-فارابي داڭعىلىنىڭ، ساين جانە جاندوسوۆ كوشەلەرىنىڭ وڭتۇستىگىندە ورنالاسقان اۋماقتارعا قاتىستى.
باسقارما مالىمەتىنشە، بۇل ايماقتارداعى تىعىز ءارى جوسپارسىز قۇرىلىس الەۋمەتتىك ينفراقۇرىلىمنىڭ جەتىسپەۋشىگى سياقتى ءبىرقاتار جۇيەلى ماسەلەگە اكەلىپ سوعىپ وتىر. اتاپ ايتقاندا، مەكتەپتەر مەن مەديسينالىق مەكەمەلەردىڭ تاپشىلىعى سەزىلەدى.
سونداي-اق، قالانىڭ جوعارى بولىكتەرىندە ورتالىقتاندىرىلعان سۋ جانە كارىز جۇيەسى جوق. بار جەلىلەر ءبىرقاتار ءمونوپوليستىڭ قاراماعىندا، ولاردىڭ قۋاتى جەتكىلىكسىز ءارى شامادان تىس جۇكتەلگەن. كوشە-جول جەلىسى كولىك لەگىنە ەسەپتەلمەگەن، ال ارىق جۇيەسىنىڭ بولماۋى جاۋىن-شاشىن كەزىندە سۋ تاسقىنىنا سەبەپ بولادى.
تاۋلى اۋماقتاردىڭ ءبىر بولىگى ىلعالدانعان كەزدە جىلجىپ كەتەتىن تۇراقسىز سازدى توپىراقتا ورنالاسقان. زاڭسىز قۇرىلىس، جاسىل جەلەكت وتاۋ، رۇقساتسىز سەپتيكتەردى قولدانۋ توپىراقتىڭ جىلجىپ، قۇرىلىستىڭ قيراۋىنا سەبەپ بولۋى مۇمكىن.
بۇعان قوسا، قالاعا وبلىستان قوسىلعان 1،5 مىڭ اۋىل شارۋاشىلىعى ماقساتىنداعى جەر تەلىمدەرى (2 000 گەكتاردان استام) ورنالاسقان. جەر كودەكسىنە سايكەس، مۇنداي جەردى پايدالانۋعا تىيىم سالىنادى. بۇل ايماقتاردى تۇرعىن ۇيگە اينالدىرۋ قالانىڭ ينجەنەرلىك جەلىلەرىنە، الەۋمەتتىك نىساندارعا جانە كولىك ينفراقۇرىلىمىنا قوسىمشا جۇك تۇسىرەدى.
«قازىرگى تاڭدا قالادا ەڭىسى 15 گرادۋستان اساتىن بەتكەيلەرگە قۇرىلىس سالۋعا تىيىم سالىنعان، جوعارعى بولىكتە عيمارات بيىكتىگى 3 قاباتتان اسپاۋعا ءتيىس جانە ەڭىستى كەسۋگە بولمايدى. سوعان قاراماستان، كەيبىر قۇرىلىسشىلار زاڭمەن ناقتى رەتتەلمەگەن تاۋنحاۋستار سەكىلدى كوپقاباتتى نىساندار سالۋدى جالعاستىرىپ كەلەدى. ەندى ەنگىزىلگەن موراتوريي اياسىندا مۇنداي تۇرعىن ۇيلەرگە جوبا الدىنداعى قۇجاتتار بەرىلمەيدى. بۇل شەكتەۋ قۇرىلىس جۇمىستارى باستالىپ كەتكەن نىساندارعا قاتىستى ەمەس. سونىمەن قاتار، باسقارما 2040 جىلعا دەيىنگى باس جوسپارعا تۇزەتۋلەر ەنگىزۋدى جوسپارلاپ وتىر. بۇل تۇزەتۋلەر جاسىل ايماقتى كەڭەيتۋگە جانە تاۋ بوكتەرى اۋماقتاردىڭ تەڭگەرىمدى دامىتۋعا باعىتتالادى. ناقتى ناتيجەلەر تۋرالى قوسىمشا حابارلانادى»، – دەدى قالالىق جوسپارلاۋ جانە ۋربانيستيكا باسقارماسىنىڭ باسشىسى الماس جاڭبىرشى.