بۇگىن ءبىلىم باسقارماسى مەن مەملەكەتتىك اكتيۆتەر باسقارماسىنىڭ وكىلدەرى جانە قوعامدىق كەڭەس مۇشەلەرى «اراي» جەكەمەنشىك مەكتەبىنىڭ وقىتۋشىلارى جانە وقۋشىلاردىڭ اتا-انالارىمەن كەزدەستى. بۇل مەكتەپ اقساي-2 شاعىناۋدانىنداعى 51-ۇيدە ورنالاسقان.
كەزدەسۋ بارىسىندا قاتىسۋشىلارعا «اراي» جانە «سەنىم» ۇيىمدارىمەن جاسالعان جالداۋ شارتتارىنىڭ بۇزىلعانى، ال 2023 جىلى اتالعان مەكەمەلەرگە عيماراتتاردى قايتارۋ تۋرالى رەسمي ەسكەرتۋلەر جىبەرىلگەنى ءتۇسىندىرىلدى.
الايدا مەكەمە ءوز ەركىمەن نىساندى بوساتۋدان باس تارتقان سوڭ سوتقا جۇگىنۋگە تۋرا كەلدى. عيماراتتى كوممۋنالدىق مەنشىككە قايتارۋ تۋرالى شەشىم مەملەكەتتىك اكتيۆتەر باسقارماسىنىڭ پايداسىنا شىعارىلدى. 2025 جىلى 3 شىلدەدە الماتى قالاسىنىڭ مامانداندىرىلعان اۋدانارالىق ەكونوميكالىق سوتى «اراي» مەكەمەسىنە عيماراتتان شىعارۋدى كەيىنگە قالدىرۋ تۋرالى ءوتىنىشىن قاناعاتتاندىرمادى.
«سوت عيماراتتى كوممۋنالدىق مەنشىك يەسىنە – مەملەكەتتىك اكتيۆتەر باسقارماسىنا ءماجبۇرلى تۇردە قايتارۋ تۋرالى شەشىم شىعاردى. 2003 جىلى 1 شىلدەدەن باستاپ «اراي» مەكەمەسىمەن جاسالعان جالداۋ شارتى كۇشىن جويعان. سودان بەرى بىرنەشە رەت سوت شەشىمى ءبىزدىڭ پايدامىزعا شىقتى. قازىرگى ۋاقىتتا مەكتەپ عيماراتتى زاڭسىز يەلەنىپ وتىر. ماسەلەنى ىڭ-شىڭسىز شەشۋگە جاسالعان بارلىق ارەكەت ەلەۋسىز قالدى. وسىعان بايلانىستى سوت شەشىمىن ءماجبۇرلى تۇردە ورىنداۋ تۋرالى شەشىم قابىلداندى»، – دەدى مەملەكەتتىك اكتيۆتەر باسقارماسىنىڭ باسشىسى ەركىنبەك ءامىرعالي.
بوساعان عيمارات قالا مۇقتاجى ءۇشىن قايتا پايدالانىلادى. بۇل شارا مەكتەپكە دەيىنگى ءبىلىم بەرۋ مەكەمەلەرىنىڭ جەلىسىن كەڭەيتىپ، بۇلدىرشىندەردى بالاباقشامەن قامتۋدى ارتتىرۋعا باعىتتالعان. بارلىق ءىس-شارا زاڭ اياسىندا جۇزەگە اسىرىلىپ جاتىر.
«بۇل عيماراتتا بۇرىن №52 بالاباقشا ورنالاسقان ەدى. ءقازىر وندا 200-گە جۋىق وقۋشى ءبىلىم الىپ جاتىر. عيمارات بوساتىلىپ، جوندەۋ جۇمىستارى اياقتالعان سوڭ قايتادان بالاباقشا رەتىندە اشىلادى. ونىڭ سىيىمدىلىعى 320 ورىنعا دەيىن ارتادى. اسىرەسە، بۇل 5 مىڭنان استام بالا كەزەكتە تۇرعان اۋەزوۆ اۋدانى ءۇشىن وتە ماڭىزدى. ءاربىر وقۋشىنىڭ وقۋىن جالعاستىرۋ ماسەلەسى تۇرعىلىقتى مەكەنجايىنا سايكەس جەكە قارالادى»، – دەدى ءبىلىم باسقارماسىنىڭ باسشىسى سايران سايفەدەنوۆ.
سونىمەن قاتار ءبىلىم باسقارماسى اتا-انالارمەن كەزدەسىپ، وقۋشىلاردى قالاداعى وزگە مەكتەپتەرگە، شاعىناۋداندارعا ورنالاستىرۋ بويىنشا جۇمىس جۇرگىزۋگە دايىن.
جالپى، 2002 جىلدان بەرى قالادا 11 جەكەمەنشىك وقۋ ورنىنا، سونىڭ ىشىندە «اراي» مەكەمەسىنە، 10 بالاباقشا عيماراتى مەن ءبىر كومبينات عيماراتى جالعا بەرىلگەن بولاتىن. 2020 جىلى مامىردا قالا اكىمدىگىنىڭ شەشىمىمەن بۇل نىسانداردى كەزەڭ-كەزەڭمەن كوممۋنالدىق مەنشىككە قايتارۋ جانە ولاردى مەملەكەتتىك بالاباقشا رەتىندە قايتا پايدالانۋ ماقساتىندا جالداۋ شارتتارىن بۇزۋ جۇمىستارى باستالعان بولاتىن.