ىلە اۋدانىنىڭ اكىمى باعدات قاراسايەۆتىڭ زاڭسىز ارەكەتتەرى ايماق ەكولوگياسىنا 204 ميلليون تەڭگە كولەمىندە زيان كەلتىرگەن. بۇل تۋرالى انتيكورۋپسيا اگەنتتىگىنىڭ رەسمي وكىلى دانيار بيگايداروۆ ۆەدومستۆودا وتكەن بريفينگتە مالىمدەدى، دەپ حابارلايدى aqshamnews.kz.
4 قىركۇيەك كۇنى تاڭەرتەڭ انتيكور الەۋمەتتىك جەلىلەردە تاراعان ىلە اۋدانى اكىمى ۇستالدى دەگەن اقپاراتتى راستادى. الماتى وبلىسى پروكۋراتۋراسى اكىمنىڭ زاڭسىز كاسىپكەرلىك قىزمەتكە قاتىسقانى جانە وكىلەتتىگىن اسىرا پايدالانعانى تۋرالى كۇدىككە ىلىنگەنىن ايتتى.
«ول سەنىمدى باسقارۋ قۇقىعىن وزىنە جاقىن كومپانياعا زاڭسىز تۇردە بەرىپ، قاتتى تۇرمىستىق قالدىقتاردى باسقارۋ پوليگونىن باسقارتقانى ءۇشىن كۇدىككە ءىلىنىپ وتىر»، – دەپ مالىمدەدى بيگايداروۆ.
تەرگەۋ مالىمەتىنشە، اكىم پوليگوندى سەنىمدى باسقارۋ مەرزىمىن زاڭسىز ۇزارتقان. شەنەۋنىك ءوزىنىڭ قىلمىستىق سحەماسىنا اۋداننىڭ قارجى جانە ءتۇرعىن-ۇي كوممۋنالدىق شارۋاشىلىعى بولىمدەرىنىڭ باسشىلارىن تارتقان.
«كەلىسىمشارت بويىنشا قاتتى تۇرمىستىق قالدىقتاردى وڭدەۋ مىندەتتەمەلەرى ورىندالماعان، ال كومپانيادان تۇسكەن تابىس ونىڭ جەكە بايىتۋىنا باعىتتالعان»، – دەپ اتاپ ءوتتى اگەنتتىكتىڭ رەسمي وكىلى.
سوتتىڭ سانكسياسىمەن كۇدىكتى قاماۋعا الىندى.