بۇل ماقساتقا قالالىق بيۋدجەتتەن 956 ميلليون تەڭگە ءبولىندى. 4 جاستان 18 جاسقا دەيىنگى جاس الماتىلىقتار مەملەكەتتىك سپورتتىق تاپسىرىس پەن جان باسىنا شاققانداعى قارجىلاندىرۋدى جۇزەگە اسىرۋدىڭ ارقاسىندا سپورتتىڭ 71 ءتۇرى بويىنشا ۇيىرمەلەر مەن سەكسيالارعا تەگىن بارا الادى. بۇل تۋرالى وڭىرلىك كوممۋنيكاسيالار قىزمەتى الاڭىندا سويلەگەن سوزىندە الماتى قالاسى سپورت باسقارماسىنىڭ باسشىسى رۇستەم بايسەيىتوۆ ايتىپ بەردى، دەپ حابارلايدى اlmaty-akshamy.kz
ەسكە سالساق، وتكەن جىلدىڭ 30 جەلتوقسانىندا قازاقستان پرەزيدەنتى قاسىم-جومارت توقايەۆ مادەنيەت، دەنە شىنىقتىرۋ جانە سپورت ماسەلەلەرى جونىندەگى زاڭعا قول قويدى. قۇجاتتا حالىقتىڭ بارلىق جاس توپتارى اراسىندا دەنە شىنىقتىرۋ مەن بۇقارالىق سپورتتى دامىتۋ جانە بالالار ءۇشىن سپورتتىق ينفراقۇرىلىمنىڭ بارىنشا قولجەتىمدىلىگىن قامتاماسىز ەتۋ جونىندەگى شارالار كوزدەلگەن.
بۇگىندە رۇستەم بايسەيىتوۆتىڭ ايتۋىنشا، مەملەكەت باسشىسى باستاماشىلىق ەتكەن جوبا ءبىرىڭعاي رەسپۋبليكالىق ARTSPORT.EDU.KZ.ەلەكتروندى پلاتفورماسىندا جۇزەگە اسىرىلۋدا
«اتا-انالاردىڭ الماتىداعى بارلىق تەگىن سەكسيالارمەن تانىسىپ، ۇيدەن شىقپاي-اق بالاعا ەڭ قولايلىسىن تاڭداۋعا مۇمكىندىگى پايدا بولدى. بۇل پلاتفورما بالانى ونلاين رەجيمىندە جازۋعا مۇمكىندىك بەرەدى، بۇل جۇمىس ىستەيتىن اتا-انالار ءۇشىن وتە ىڭعايلى. بيىل بارلىعى 53 526 ءوتىنىم بەرىلىپ، 37 سپورت تۇرىنەن 41 530 ءوتىنىم بويىنشا ۆاۋچەرلەر ىسكە قوسىلدى»، - دەپ حابارلادى سپورت باسقارماسىنىڭ باسشىسى.
ونىڭ ايتۋىنشا، الماتىلىق بالالار اراسىندا فۋتبول، شاحمات، تاەكۆوندو، دزيۋدو جانە ءجۇزۋ بويىنشا تەگىن سەكسيالار سۇرانىسقا يە.
ول اتا-انالاردىڭ بالانىڭ تۇرعىلىقتى جەرىنەن جاياۋ قاشىقتىقتا سەكسيالاردى تاڭداۋعا مۇمكىندىگى بار ەكەنىن ايتتى. مىسالى، ءار اۋداندا 100 دەمالۋ ورتالىعى جۇمىس ىستەيدى، وندا 8 مىڭنان استام ادامدى قامتي وتىرىپ، 36 سپورت سەكسيالارى مەن ۇيىرمەلەرى تەگىن جۇمىس ىستەيدى.
2023 جىلعا قاراي ورتالىقتار سانىن 200-گە دەيىن ارتتىرۋ جوسپارلانعان، بيىل قوسىمشا تاعى 50ء-ى اشىلدى.
بالالاردى سپورتپەن قامتۋ تۋرالى ايتا كەلە، ر. بايسەيىتوۆ وقۋشىلاردى جەڭىل اتلەتيكاعا تارتاتىن «Kids Athletics» باعدارلاماسىنىڭ ىسكە اسىرىلۋىن اتاپ ءوتتى.
«Kids Athletics» جاتتىعۋلارى جەڭىل اتلەتيكانىڭ بارلىق پاندەرىنىڭ نەگىزدەرىن: سپرينتەرلىك جۇگىرۋ، ەستافەتالار، توزىمدىلىككە جۇگىرۋ، نايزا مەن دوپ لاقتىرۋ، سپورتتىق ءجۇرۋ، ۇزىندىققا جانە سىرىقپەن سەكىرۋ نەگىزدەرىن قامتي وتىرىپ، ويىن جارىس فورماتىندا وتكىزىلەدى. 6 جاستان 15 جاسقا دەيىنگى بالالار سپورتپەن شۇعىلدانا الادى، ال كەيىننەن كاسىبي سپورتقا كوشەدى»، - دەدى ر. بايسەيىتوۆ.
ايتا كەتەرلىگى، اتالعان باعدارلاماعا قاتىسۋشى 60-تان استام بالا بجسم-گە قابىلداندى.