الماتىلىق ۋرولوگتار جوعارى تەحنولوگيالاردىڭ كومەگىمەن زەينەتكەرگە كۇردەلى وتا جاسادى
ورتالىق قالالىق كلينيكالىق اۋرۋحانادا نەسەپ جولدارى پاتولوگياسىمەن تۇسكەن 66 جاستاعى پاسيەنتكە كۇردەلى وتا جاسالدى. وپەراسيا مىندەتتى الەۋمەتتىك مەديسينالىق ساقتاندىرۋ شەڭبەرىندە جاسالدى، دەپ حابارلايدى almaty-akshamy.kz وقكا باسپا ءسوز قىزمەتىنە سىلتەمە جاساپ.
1956 جىلى تۋعان ەر ادام كوپتەن بەرى كىشى دارەتى تۇرماي اۋىرعان. تەكسەرۋ بارىسىندا ۋرولوگتار وعان قۋىق ديۆەرتيكۋلى دەگەن دياگنوز قويدى.
ۋرولوگ باقىت دوسقوجايەۆتىڭ ايتۋىنشا، ديۆەرتيكۋل – قۋىق قابىرعاسىنىڭ قالتا تارىزدەنىپ كەتۋى. بۇل قۋىقاستى بەزى ادەنوماسى، ءۇرپىنىڭ تارىلۋى، نەسەپ-زار جولدارىنداعى ىسىك، قۋىق موينىنىڭ ستەنوزى سىندى اۋرۋلار سالدارىنان تۋىندايتىن دەرت.
«ەر ادامعا وتا جاساۋ قاجەت بولدى. ءبىز ەشبىر تىلىكسىز، شاعىن ءينۆازيۆتى ەندوسكوپيالىق وپەراسيا جاسادىق. ەندوسكوپتىڭ كومەگىمەن جاسالاتىن بۇل وپەراسيا قان كەتۋدىڭ الدىن الىپ، پاسيەنتتىڭ تەزىرەك جازىلىپ كەتۋىنە مۇمكىندىك بەرەدى. زەينەتكەرگە ەپيدۋرالدى جانسىزداندىرۋ ءادىسى قولدانىلدى. وتا 40 مينۋتقا سوزىلدى. پاسيەنت ەرتەڭىنە اياققا تۇردى»، - دەپ اتاپ ءوتتى دارىگەر.
ديۆەرتيكۋلدى دارى-دارمەكپەن ەمدەۋ مۇمكىن ەمەس، ول تەك قانا حيرۋرگيالىق ادىسپەن ەمدەلەدى، دەيدى مامان.