2025 جىلدىڭ ءبىرىنشى جارتىجىلدىعىندا مەگاپوليسكە 1،1 ميلليون تۋريست كەلگەن - بۇل وتكەن جىلمەن سالىستىرعاندا 6،5%-عا كوپ. ولاردىڭ 320 مىڭى شەتەلدىك قوناقتار. بۇل تۋرالى الماتى قالاسى اكىمىنىڭ ورىنباسارى ولجاس سماعۇلوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ايتتى.
ايتۋىنشا، كورسەتىلگەن تۋريستىك قىزمەتتەردىڭ كولەمى 50 ملرد تەڭگەدەن استى (+16،6%). نەگىزگى ءوسىم ءۇندىستان، جۇڭگو، ءباا جانە مالايزيادان كەلگەن تۋريستەر ەسەبىنەن قامتاماسىز ەتىلگەن. سالالىق ينۆەستيسيالار سەگىز ايدا 104 ملرد تەڭگەگە جەتىپ، 62،7%-عا ارتقان، ال سالىق تۇسىمدەرى 28،6%-عا ءوسىپ، 59،3 ملرد تەڭگەنى قۇراعان.
ءتۋريزمنىڭ دامۋىنا اۋە قاتىناسىنىڭ كەڭەيۋى دە ىقپال ەتۋدە: 2025 جىلى گۋانچجوۋ، ينين، شانحاي، دانانگ، الانيا جانە وش قالالارىنا جاڭا رەيستەر اشىلدى. Mastercard دەرەكتەرى بويىنشا، شەتەلدىك تۋريست الماتىدا تاۋلىگىنە ورتا ەسەپپەن $441 جۇمسايدى - بۇل ىشكى تۋريستەرگە قاراعاندا 8،7 ەسە كوپ. قالا «قالا + تاۋ» باعىتىنداعى ارالاس مارشرۋتتاردى، وقيعالى ءتۋريزمدى، گاستروتۋرلاردى جانە ەكونوميكالىق قايتارىمى 3–4 ەسە جوعارى ىسكەرلىك ءتۋريزمدى (MICE) بەلسەندى دامىتىپ كەلەدى.
«قازىرگى ۋاقىتتا جالپى قۇنى 300 ملرد تەڭگەنى قۇرايتىن 21 ءقوناقۇي قۇرىلىسى ءجۇرىپ جاتىر. ولاردىڭ قاتارىندا Hilton، St. Regis، Marriott، Radisson جانە Tapestry by Hilton برەندتەرى بار. بەسەۋى - 5 جۇلدىزدى قوناقۇيلەر»، - دەدى الماتى قالاسى اكىمىنىڭ ورىنباسارى ولجاس سماعۇلوۆ.
الماتى بىرتىندەپ ءوڭىردىڭ تانىمال تۋريستىك برەندىنە اينالۋدا - مادەنيەت، تابيعات جانە يننوۆاسيا توعىسقان، ءاربىر قوناققا ەرەكشە اسەر سىيلايتىن قالا.