الماتى قالاسىنىڭ المالى اۋدانىندا سكۆەرلەردى، كوشەلەردى جانە تروتۋارلاردى اباتتاندىرۋ جۇمىستارى جۇيەلى تۇردە جالعاسىپ جاتىر، - دەپ حابارلايدى aqshamnews.kz.
اۋداندا جايلى قالالىق ورتا قالىپتاستىرۋ باعىتىنداعى جۇمىستار جالعاسىپ جاتىر. قوعامدىق كەڭىستىكتەردى جاقسارتۋعا، كوگالداندىرۋعا، جول جيەگىن جوندەپ، دەمالىس ايماقتارىن جاڭارتۋعا كوپ كوڭىل ءبولىنىپ وتىر. بيىلعى جىلى ءبىرقاتار ماڭىزدى نىسانداردا ينفراقۇرىلىمدى جەتىلدىرۋ جۇمىستارى باستالدى نەمەسە باستالىپ قالادى الدا. الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا اۋدان اكىمى ارمان شامشين وسىلاي دەدى.
اتاپ ايتقاندا، ا.يمانوۆ اتىنداعى سكۆەردە جوندەۋ جۇمىستارى اياقتالۋعا جاقىن. سونىمەن قاتار، «حالىق قاتىساتىن بيۋدجەت» باعدارلاماسى اياسىندا مامىر ايىنان باستاپ قاراساي باتىر جاياۋ جۇرگىنشىلەر كوشەسىنىڭ ابىلاي حان داڭعىلىنان ناۋرىزباي باتىر كوشەسىنە دەيىنگى بولىگىندە اباتتاندىرۋ جانە كوگالداندىرۋ جۇمىستارى جۇرگىزىلىپ جاتىر. بۇل جۇمىستار شىلدە ايىندا اياقتالادى دەپ جوسپارلانىپ وتىر.
كابانباي باتىر كوشەسىندە (بايسەيىتوۆا كوشەسىنەن ابىلاي حان داڭعىلىنا دەيىن)، سونداي-اق استانا الاڭىندا (پانفيلوۆ كوشەسىنەن ابىلاي حان داڭعىلىنا دەيىن) تروتۋار جامىلعىسى اۋىستىرىلدى. جوندەۋ جۇمىستارى ناقتى قاجەتتىلىككە ساي، ياعني جاياۋ جۇرگىنشىلەرگە قولايسىزدىق تۋدىراتىن، توزىعى جەتكەن جەرلەردە عانا جۇرگىزىلەدى.
تامىز ايىندا جاڭا جوبالار ىسكە اسادى: كابانباي باتىر كوشەسىنىڭ (ابىلاي حان داڭعىلىنان سەيفۋللين داڭعىلىنا دەيىن) جانە گوگول كوشەسىنىڭ (نازاربايەۆ داڭعىلىنان ابىلاي حانعا دەيىن) تروتۋارلارى جاڭارتىلماق.
سونىمەن قاتار، ع.مۇسىرەپوۆ اتىنداعى جاسوسپىرىمدەر تەاترى جانىنداعى سكۆەر مەن جىبەك جولى داڭعىلى بويىنداعى «اربات» جاياۋ جۇرگىنشىلەر ايماعىن اباتتاندىرۋ بويىنشا جوبالىق-سمەتالىق قۇجاتتاما دايىن. بۇل ۋچاسكەلەردەگى جوندەۋ جۇمىستارى تامىز ايىندا باستالادى.
«ءبىزدىڭ بالانسىمىزدا اباي مەن تۇركەبايەۆ كوشەلەرىنىڭ قيىلىسىندا ەسكى عيمارات بار. ءبىز بۇل نىساندى قالاي جاڭالاۋ جاعىن ۇزاق ۋاقىت قاراستىردىق. قالا اكىمدىگىنىڭ كەلىسىمىمەن اتالعان عيماراتتى ەگدە جاستاعى ازاماتتارعا ارناپ، سولاردىڭ دەمالاتىن ورتالىعى رەتىندە پايدالانۋ جوباسىن جاسادىق. مۇندا زەينەتكەرلەردىڭ تاجىريبەسى مەن ءبىلىمى بالالارعا ارنالعان ۇيىرمەلەر ارقىلى دا قولدانىلاتىن بولادى»، – دەدى ارمان شامشين.
المالى اۋدانى تۇرعىنداردىڭ شىنايى سۇرانىستارىنا نەگىزدەلگەن شەشىمدەردى ۇسىنىپ، قولايلى ورتا قالىپتاستىرۋ جۇمىستارىن تۇراقتى تۇردە جۇرگىزىپ كەلەدى.