الماتى قالاسىنىڭ المالى اۋدانىندا ورنالاسقان ساۋدا بۋتيگىندە وق-دارىلەر سالىنعان قاپشىق تابىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پوليسيا دەپارتامەنتىندە حابارلاعانداي، بۋتيككە جۇمىسقا كەلگەن قۇرىلىسشىلار باسپالداق استىنان جاسىل قاپشىق تاۋىپ العان.
«اتالعان ءۇي-جايدىڭ ارتقى ەسىگى بار. جوندەۋ جۇمىستارى كەزىندە ول اشىلدى، مۇندا كوشەدەن ەركىن كىرۋگە بولادى. قاپشىق زاتتارعا تولى ەكەن. پوليسەيلەر ۆينتوۆكالار مەن تەگىس ۇڭعىلى قارۋلارعا ارنالعان ءارتۇرلى كاليبرلى بىرنەشە ونداعان پاترونداردى تاركىلەدى.
سونداي-اق، مۇندا جوعارى قاباتتا حوستەل ورنالاسقان. وسىندا كەلگەن قوناقتاردىڭ ءبىرى بۇل قاپشىقتى ارنايى جاسىرعان دەپ بولجاۋعا بولادى.
بۇل وق-دارىلەر تابىلعاننان كەيىن باستالعان تەرگەۋ بارىسىندا انىق بەلگىلى بولادى»، - دەدى پوليسيا دەپارتامەنتىندە.