مەملەكەت باسشىسى باس پروكۋرور عيزات نۇرداۋلەتوۆتى قابىلدادى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
پرەزيدەنتكە قاسىرەتتى قاڭتار وقيعاسىن تەرگەپ-تەكسەرۋ جۇمىستارىنىڭ بارىسى جانە رۇقسات ەتىلمەگەن تەرگەۋ ادىستەرىنە قاتىستى ازاماتتار مەن قۇقىق قورعاۋشىلاردىڭ مالىمەتتەرى نەگىزىندە قابىلدانىپ جاتقان شارالار تۋرالى باياندالدى.
قاسىم-جومارت توقايەۆقا بۇگىندە 3070 قىلمىستىق ءىس قوزعالعانى تۋرالى مالىمەت بەرىلدى. ونىڭ 2710-ىن، سونىڭ ىشىندە، نەگىزىنەن، ۇرلىق، توناۋ، بۇزاقىلىق، قارۋ ۇرلاۋ جانە باسقا دا قىلمىستاردى ىشكى ىستەر ورگاندارى تەرگەپ-تەكسەرىپ جاتىر.
باس پروكۋروردىڭ ايتۋىنشا، سىبايلاس جەمقورلىققا قارسى قىزمەت قۇقىق قورعاۋ ورگاندارى قىزمەتكەرلەرىنىڭ لاۋازىمدىق وكىلەتتىكتەرىن اسىرا پايدالانعانى تۋرالى ازاماتتاردىڭ شاعىمدارى بويىنشا 173 ءىستى جۇرگىزۋدە. مەملەكەتكە وپاسىزدىق جاساۋ، وكىلەتتىكتەردى اسىرا پايدالانۋ جانە بيلىكتى باسىپ الۋعا ارەكەت ەتۋ بويىنشا 15 ءىس ۇلتتىق قاۋىپسىزدىك كوميتەتىنىڭ قاراۋىندا جاتىر. سونداي-اق ارناۋلى پروكۋرورلاردىڭ باسشىلىعىمەن ۆەدومستۆوارالىق تەرگەۋ توبى جاپپاي تارتىپسىزدىكتەر مەن تەرروريزم اكتىلەرى بويىنشا 179 ءىستى تەكسەرۋدە.
تارتىپسىزدىكتەر ءورشىپ تۇرعان كەزدە قىزمەتتىك عيماراتتاردى تاستاپ كەتكەن كۇشتىك قۇرىلىمدار ورگاندارىنىڭ لاۋازىمدى تۇلعالارىنا قاتىستى بولەك تەرگەۋ جۇرگىزىلۋدە. وسىنداي ارەكەتتەردىڭ سالدارىنان الماتى قالاسىندا، الماتى جانە جامبىل وبلىستارىندا قۇقىق قورعاۋ ورگاندارىنىڭ ارسەنالىنداعى 1500-نان استام قارۋ قىلمىسكەرلەردىڭ قولىنا تۇسكەن.
جالپى العاندا، قاڭتار وقيعاسى كەزىندە 3388 قارۋ، ونىڭ ىشىندە 10 اڭشىلىق دۇكەنىنەن 1629 مىلتىق ۇرلانعان. وسىنىڭ تەك ۇشتەن ءبىرى نەمەسە 967 قارۋ تابىلدى. قارۋلاردى ىزدەۋ جانە قايتارىپ الۋ جۇمىستارى جالعاسىپ جاتىر. بارلىق فاكتىلەر بويىنشا تەرگەپ-تەكسەرۋ جۇرگىزىلۋدە.
بۇدان بولەك، عيزات نۇرداۋلەتوۆ پرەزيدەنتكە جانار-جاعارماي ماتەريالدارى، سۇيىلتىلعان گاز اينالىمى جانە باعانى بەلگىلەۋ، كەدەندىك شەكارا سالاسىنداعى تەكسەرۋدىڭ الدىن الا ناتيجەلەرى تۋرالى ەسەپ بەردى.
مەملەكەت باسشىسى قىلمىستىق قۋدالاۋعا تۇسكەن ازاماتتاردىڭ كونستيتۋسيالىق قۇقىعىن ساقتاۋدىڭ ماڭىزدى ەكەنىن اتاپ ءوتتى. قاسىم-جومارت توقايەۆ كىنالى ادامدارعا قاتىستى جاۋاپكەرشىلىك شارالارىن قابىلداي وتىرىپ، ءاربىر راستالعان حابارلاماعا دەر كەزىندە نازار اۋدارۋدى، سونداي-اق تەرگەۋ بارىسى جونىندە حالىققا ۋاقىتىلى اقپارات بەرۋدى تاپسىردى.