الماتى وبلىسى بويىنشا سىبايلاس جەمقورلىققا قارسى قىزمەتى ازاپتاۋ فاكتىسىمەن 37 قىلمىستىق ءىستى تەرگەۋدە، دەپ حابارلايدى Almaty-akshamy.kz قازاقپاراتقا سىلتەمە جاساپ
«ونىڭ ىشىندە سىبايلاس جەمقورلىققا قارسى قىزمەتى 27 ءىستى، پد وزىندىك قاۋىپسىزدىك باسقارماسى 6 ءىستى، پروكۋراتۋرا ورگاندارى 4 ءىستى تىركەگەن»، - دەدى الماتى وبلىستىق سىبايلاس جەمقورلىقپەن كۇرەس دەپارتامەنتى باسشىسىنىڭ ورىنباسارى دۋلات مادياروۆ.
ۆەدومستۆو وكىلىنىڭ ايتۋىنشا، قاڭتار وقيعالارى بويىنشا تەرگەلىپ جاتقان قىلمىستىق ىستەردى تىركەۋگە نەگىز بولىپ قۇقىق قورعاۋ ورگاندارى قىزمەتكەرلەرى قىلمىستى مويىنداتۋ ءۇشiن جابىرلەنۋشىلەردى ازاپتاعان دەگەن ارىزدار مەن شاعىمدار تابىلعان.
«پوليسيا قىزمەتكەرلەرىنىڭ ىس-ارەكەتتەرىنە قاتىستى ارىزبەن جابىرلەنۋشىلەردىڭ قورعاۋشىلارى، تۋىستارى، اتا-انالارى جانە وزدەرى دە سىبايلاس جەمقورلىققا قارسى قىزمەتىنە جۇگىنگەن. سونىمەن قاتار، بۇقارالىق اقپارات قۇرالدارىنا كۇندەلىكتى تالداۋ جاسالىپ، قاجەتتى تەرگەۋ امالدارى جۇرگىزىلۋدە»، - دەدى دۋلات مادياروۆ.
قازىرگى تاڭدا، ءىستىڭ جان-جاقتىلىعىن قامتۋ ماقساتىندا كۇندەلىكتى قارقىندى ءبىرقاتار تەرگەۋ ارەكەتتەرى جۇرگىزىلۋدە.
اتاپ ايتقاندا، بارلىق ارىزدانۋشىلار جابىرلەنۋشى رەتىندە تانىلىپ، ولاردان ازاپتاۋدىڭ قالاي جانە قاي جەردە بولعاندىعى تۋرالى جاۋاپ الىندى، تانۋ جانە بەتتەستىرۋ ارەكەتتەرى، ولارمەن وقيعا بولعان جەرگە بارىپ ءمان-جايدىڭ قالاي بولعاندىعى تۋرالى تەرگەۋ ارەكەتتەرى جۇرگىزىلۋدە، جاراقاتتاردىڭ اۋىرلىق ساناتىن انىقتاۋ ءۇشىن ءتيىستى مەديسينا سالاسىنىڭ قىزمەتكەرلەرىنىڭ قاتىسۋىمەن سوت-مەديسينالىق ساراپتامالار تاعايىندالدى.
ءار جازعان ارىز بويىنشا بولەك قىلمىستىق ىستەر تىركەلىپ، جابىرلەنۋشىلەردىڭ وكىلدەرىمەن جەكە-دارا جۇمىستار اتقارىلىپ جاتىر. ءار قىلمىستىق ءىس بويىنشا پروسەستىك پروكۋرورلار تاعايىندالدى.
بارلىق قىلمىستىق ىستەر سىبايلاس جەمقورلىققا قارسى قىزمەتى اگەنتتىگى مەن پروكۋراتۋرا ورگاندارىنىڭ قاتاڭ باقىلاۋىندا تۇر.
«ءوز تاراپىمنان جانە سىبايلاس جەمقورلىققا قارسى قىزمەتى اتىنان ءار ءىس بويىنشا كىنالى تۇلعالاردى انىقتاۋعا جانە جاۋاپكەرشىلىككە تارتۋعا باعىتتالعان ارەكەتتەردى جالعاستىراتىندىعىمىزدى مالىمدەيمىن. باسقا اقپارات تەرگەۋدىڭ قۇپيالىلىعىن ساقتاۋ ماقساتىندا جاريالاۋعا جاتپايدى»، - دەپ تولىقتىردى الماتى وبلىستىق سىبايلاس جەمقورلىقپەن كۇرەس دەپارتامەنتى باسشىسىنىڭ ورىنباسارى دۋلات مادياروۆ.