بۇل تۋرالى الماتى قالاسى المالى اۋدانى اكىمىنىڭ ورىنباسارى ساپار نۇراشيەۆ وڭىرلىك كوممۋنيكاسيالار قىزمەتىنىڭ بريفينگىندە مالىمدەدى، دەپ حابارلايدى اlmaty-akshamy.kz.
«الەۋمەتتىك ماڭىزى بار تاۋارلار باعاسىنىڭ نەگىزسىز وسۋىنە جول بەرمەۋ ماقساتىندا اپتا سايىن ماسانچي كوشەسىندە ايتەكە بي كوشەسىنەن گوگول كوشەسىنە دەيىن «دەمالىس كۇنى» جارمەڭكەلەرى وتكىزىلەدى. جارمەڭكەگە الماتى وبلىسىنىڭ (قاراساي اۋدانى) 90-نان استام شارۋا قوجالىقتارى مەن اۋدان كاسىپكەرلەرى قاتىسۋدا»، - دەدى س.نۇراشيەۆ.
ول وتكەن كەزەڭدە جارمەڭكەدەگى باعا تۇراقتى، ورتاشا العاندا نارىقتىق باعادان 10%-عا تومەن بولعانىن اتاپ ءوتتى. تۇرعىنداردى قامتۋ 35% قۇرايدى.
سونداي-اق، جىبەك جولى كوشەسىندە سەيفۋللين داڭعىلى مەن ناۋرىزباي باتىر كوشەسىنىڭ ارالىعىندا ءار ايدىڭ سوڭعى دەمالىس كۇندەرى حالىقارالىق شەبەرلەردى تارتۋ ارقىلى قولونەر جارمەڭكەسى وتكىزىلىپ تۇرادى.
سونىمەن قاتار، اكىم ورىنباسارىنىڭ ايتۋىنشا، اۋدانداعى ساۋدا ورىندارىندا جانە بازارلاردا ءامات باعاسىنا اپتا سايىن مونيتورينگ جۇرگىزىلەدى. اۋداندا 408 ءۇي جانىنداعى دۇكەن بار. بۇگىندە 400-دەن استام دۇكەن مەن التى بازار تەكسەرىلىپ، ساۋدا ۇستەمەسىنىڭ 15 پايىزدان اسپاۋىنىڭ الدىن الۋ جانە ءتۇسىندىرۋ جۇمىستارى جۇرگىزىلدى.
سونداي-اق، اۋدان اكىمدىگى ۇسىنىلعان باعالار بويىنشا تاۋارلاردى ساتىپ الۋ ءۇشىن ءامات جەتكىزۋ بويىنشا ءبىرىڭعاي كوتەرمە ساۋدا وپەراتورىنىڭ بايلانىستارىن تاراتتى.