المالى اۋدانىنىڭ تۇرعىندارى ەلەكتر قۋاتىنىڭ ءجيى اپاتتىق وشۋلەرى تۋرالى ورىندى شاعىمدارى سوڭعى جىلدارى كوپتەگەن جۇمىستاردى تالاپ ەتتى. الايدا، 2022 جىلدان باستاپ «اجك» اكسيونەرلىك قوعامىمەن بىرلەسىپ، قالانىڭ ەلەكتر جەلىلەرىن مودەرنيزاسيالاۋ باعىتىندا جۇيەلى جۇمىستار قولعا الىنعان. بۇل جۇمىستار ايتارلىقتاي ناتيجەلەر كورسەتىپ، اۋدان تۇرعىندارىن ەلەكترمەن جابدىقتاۋداعى ماسەلەلەردى شەشۋگە باعىتتالعان اۋقىمدى شارالاردى ىسكە اسىرىلىپ جاتقانىن اۋدان تۇرعىندارىمەن كەزدەسۋىندە قالا اكىمى ە.دوسايەۆ ءمالىم ەتتى، دەپ حابارلايدى aqshamnews.kz
- «اجك» اكسيونەرلىك قوعامى مەن قالا اكىمدىگى اراسىندا جۇرگىزىلگەن بىرلەسكەن جۇمىس ناتيجەسىندە سوڭعى 3 جىلدا اۋداننىڭ ەلەكتر جەلىلەرىنىڭ توزۋ دەڭگەيىن 80%-تەن 61%-كە دەيىن تومەندەتە الدىق. بۇل كورسەتكىش ايتارلىقتاي جەتىستىك بولىپ تابىلادى جانە ەلەكتر جۇيەلەرىنىڭ سەنىمدىلىگىن ارتتىرۋعا ىقپال ەتتى. بۇل جۇمىس ءالى دە جالعاسۋدا، جانە بولاشاقتا ەلەكتر قۋاتىنىڭ ءجيى ءوشۋى ماسەلەسىن تولىقتاي شەشۋ ماقساتىندا جۇمىستار جالعاسا بەرەدى، - دەدى ە.دوسايەۆ،
2024 جىلى اۋدان تۇرعىندارىن تۇراقتى ەلەكتر جۇيەسىمەن قامتاماسىز ەتۋ ماقساتىندا ماڭىزدى جوبالار ىسكە اسىرىلدى. رايىمبەك – ناۋرىزباي باتىر – مامەتوۆا – سەيفۋللين كوشەلەرىنىڭ جانە جامبىل – اۋەزوۆ – اباي – روزىباكييەۆ كوشەلەرىنىڭ اۋماعىندا 7،7 كم ەلەكتر جەلىلەرى رەكونسترۋكسيالاندى. بۇل جۇمىس اۋداننىڭ ەلەكترمەن جابدىقتاۋ جۇيەسىن جاڭارتۋعا، ونىڭ سەنىمدىلىگىن ارتتىرۋعا باعىتتالعان ماڭىزدى قادام.
- سىرتقى جارىقتاندىرۋ ماسەلەسىنە دە ەرەكشە نازار اۋدارىلدى. 58،1 كم ەسكى كابەل جەلىلەرى جاڭارتىلىپ، 4 400-دەن استام شام اۋىستىرىلدى، 193 جاڭا جارىقتاندىرۋ تىرەكتەرى ورناتىلدى. بۇل جۇمىستاردىڭ جالپى قۇنى 1،3 ملرد تەڭگەنى قۇرادى، جانە ناتيجەسىندە 46 كوشە مەن 185 اۋلا اۋماعى ساپالى جارىقپەن قامتاماسىز ەتىلدى، دەدى قالا اكىمى ە.دوسايەۆ.
بيىل ەلەكترمەن جابدىقتاۋ جۇيەلەرىن ودان ءارى جاقسارتۋ ماقساتىندا 27،1 كم ەلەكتر جەلىلەرىن رەكونسترۋكسيالاۋ، سونداي-اق 85 ترانسفورماتورلىق ستانسيانى جوندەۋ جانە جاڭا 1 ستانسيا سالۋ جوسپارلانۋدا. بۇل جۇمىستار اۋدان تۇرعىندارىن تۇراقتى جانە ساپالى ەلەكتر قۋاتىمەن قامتاماسىز ەتۋگە باعىتتالعان ماڭىزدى شارالار بولىپ تابىلادى.
كوشە جارىعىن جاقسارتۋ بويىنشا دا جۇمىستار جالعاسىن تابادى. 4 500 شامدى مودەرنيزاسيالاۋ، 58 كم كابەل جەلىلەرىن اۋىستىرۋ جانە 483 جارىقتاندىرۋ تىرەكتەرىن ورناتۋ جوسپارلانۋدا. بۇل جۇمىستارعا جالپى 1،8 ملرد تەڭگە بولىنگەن. وسى جۇمىستاردىڭ ناتيجەسىندە اۋداندا كوشە جارىعىنىڭ ساپاسى ايتارلىقتاي جاقسارىپ، تۇرعىندار ءۇشىن ءقاۋىپسىز ءارى جايلى جاعدايلار جاسالادى.