الەۋمەتتىك جەلىلەر مەن سيفرلىق الەمدە جاڭا سەرپىلىس جاساعان اتىراۋلىق اجە تاپتاۋرىندار مەن ستەرەوتيپتەردى بۇزىپ، شىنايى ۇلگى كورسەتۋدە، دەپ حابارلايدى aqshamnews.kz.
70 جاسار اتىراۋلىق اجە تيكتوكتا ستريم جۇرگىزىپ، 10 ميلليون تاپقان. ءيا-يا، تيكتوكەرلەردىڭ اراسىندا ءقازاقتىلدى اجەمىز توپ باستاپ، 250 مىڭ وقىرمان، ونداعان ميلليون لايك جيناپ، جەرگىلىكتى تانىمال تۇلعاعا اينالعان دەسەك تە بولادى.
اجەمىز 26 جاسىندا جەسىر قالىپ، 40 جىل بويى ەدەن جۋۋشى بولىپ، كۇن كورگەن، بالا-شاعاسىن باققان ەكەن. ال ءقازىر جاستاردى شاڭ قاپتىرىپ، ميلليونەر اتانىپ وتىر.
ومىرىندە كوپ قيىندىقتار مەن اۋىرتپالىقتاردى باستان وتكەرگەن، ءبىراق ەشقاشان قولدى ءبىر سىلتەپ بەرىلمەگەن قازاق ايەلى بۇگىندە زاماناۋي الەمنىڭ تالابى مەن مۇمكىندىكتەرىن ۇتىمدى پايدالانىپ وتىر. TikTok سياقتى پلاتفورمالاردا جاس تا، جاسامىس تا ءوزىن تانىتىپ، ب ا ق قۋا الادى دەگەن اجەمىز – وسىنىڭ ايقىن دالەلى.
تەك ەلىمىزدە عانا ەمەس، بۇكىل الەمدە قارتايۋدى مۇلدەم باسقا تۇرعىدا كورەتىن جاڭا كوزقاراس قالىپتاستىرىپ وتىرعان اجەنىڭ جەتىستىگى جاستارعا دا ۇلكەن ىنتالاندىرۋ بولىپ تابىلادى.