وقيعا Spirit Airlines اۆياكومپانياسىنىڭ NK951 رەيسى گايتي استاناسى پورت-و-پرەنس قالاسىنداعى تۋسسەن-لۋۆەرتيۋر حالىقارالىق اۋەجايىنا قونۋ كەزىندە ورىن العان. Airbus A320neo ۇشاعى قونۋعا جاقىنداپ قالعاندا، اۋە كەمەسىنە باعىتتالعان وق ۇشاقتىڭ الدىڭعى بولىگىندەگى قاپتامانى تەسىپ ءوتىپ، كابينا مەن جوعارعى جۇك بولىگىنە زاقىم كەلگەن، دەپ حابارلايدى aqshamnews.kz.
وسى ساتتەن كەيىن ۇشاق قايتا كوككە كوتەرىلىپ، دومينيكان رەسپۋبليكاسىنىڭ سانتياگو قالاسىنداعى قوسىمشا اۋەجايعا قوندى.
اتقىلاۋ ناتيجەسىندە ءبىر بورتسەرىك جەڭىل جاراقات الىپ، مەديسينالىق قىزمەتكەرلەردىڭ باقىلاۋىنا الىندى. جولاۋشىلاردىڭ اراسىندا زارداپ شەككەندەر تۋرالى اقپارات جوق. ۇشاق پايدالانۋدان شىعارىلدى، ال بارلىق جولاۋشىلار مەن ەكيپاج مۇشەلەرى باسقا ۇشاقپەن وتىرعىزىلدى.
وقيعا سالدارىنان پورت-و-پرەنس اۋەجايىنا باعىتتالعان بارلىق رەيستەر توقتالعان.
Spirit Airlines كومپانياسى وقيعا بويىنشا رەسمي مالىمدەمە جاسادى. وندا رەيس فورت-لودەردەيلدەن (فلوريدا) پورت-و-پرەنس قالاسىنا باعىت العان كەزدە، ۇشاقتىڭ سانتياگو (دومينيكان رەسپۋبليكاسى) اۋەجايىنا قايتا باعىتتالعانى، تەكسەرۋ كەزىندە ۇشاقتىڭ زاقىمدانعانى، جانە بۇل زاقىمداردىڭ اتقىلاۋدان بولعانى مۇمكىن ەكەنى ايتىلدى. كومپانيا، سونداي-اق، بورتسەرىكتىڭ جەڭىل جاراقات العانىن جانە قازىرگى تاڭدا مەديسينالىق باقىلاۋدا ەكەنىن حابارلادى.
پاسساجيرلەردىڭ ەشقايسىسى جاراقات العان جوق. ۇشاقتى پايدالانۋ توقتاتىلىپ، جولاۋشىلار مەن ەكيپاج باسقا ۇشاقپەن جەتكىزىلەتىن بولادى. Spirit Airlines كومپانياسى قاۋىپسىزدىككە باسا نازار اۋدارىپ، پورت-و-پرەنس جانە كاپ-ايتەن اۋەجايلارىنا قىزمەت كورسەتۋدى ۋاقىتشا توقتاتتى.