ءتورت كۇن ىشىندە ىزدەۋدە بولعان 17 ادام انىقتالدى
سولتۇستىك قازاقستان وبلىسىندا اليمەنت تولەۋدەن جالتارىپ جۇرگەندەردى انىقتاۋعا باعدارلانعان اكسيا ءجۇرىپ جاتىر. ءىس-شارانىڭ ءتورت كۇنىندە پوليسەيلەر مىندەتىن ورىنداۋدان قاشىپ، بالاسىنا قارىز بولعان 9 ادامدى انىقتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سقو پوليسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆل تۇرعىنى ءوز بالاسىنا التى جىل بويى اليمەنت تولەمەي كەلگەن. مىندەتىن ورىنداۋدان جالتارعان سولتۇستىكقازاقستاندىق «اكەنى» پوليسەيلەر قازىرگى ۋاقىتتا الماتى قالاسىندا جۇرگەنىن انىقتادى. بۇل اقپارات جەكە سوت ورىنداۋشىسىنا بەرىلدى.
بۇل كۇندەرى وڭىردە سقو پوليسيا دەپارتامەنتى كوشى-قون قىزمەتى باسقارماسىنىڭ قىزمەتكەرلەرىمەن اليمەنت تولەمەۋشىلەردى ىزدەستىرۋ اكسياسىن وتكىزىپ جاتىر. اليمەنتتەرىن، اكىمشىلىك ايىپپۇلدارىن تولەمەي جۇرگەن بورىشكەرلەر، جاقىندارىمەن تۋىستىق قاتىناستارىن جوعالتقان ادامدار پوليسەيلەردىڭ نازارىندا بولادى. اكسيا 19 جەلتوقساندا باستالدى. ءتورت كۇن ىشىندە ىزدەۋدە بولعان 17 ادام انىقتالدى. ولاردىڭ 9-ى - اليمەنت تولەمەۋشىلەر. سونداي-اق، تۋىستىق قاتىناستارىن جوعالتقان 5، قارىزدارىن تولەمەگەن 3 ادام انىقتالدى. كوشى-قون قىزمەتىنىڭ ايتۋىنشا، بۇل جۇمىستار ۇدايى نەگىزدە جۇرگىزىلەدى.
«اكسياعا پوليسيانىڭ باسقا دا قىزمەتتەرى جۇمىلدىرىلادى. جىل باسىنان كوشى-قون قىزمەتىنىڭ قىزمەتكەرلەرىمەن وبلىس بويىنشا بارلىعى 204 ىزدەستىرۋ ءىسى توقتاتىلدى، ونىڭ 22ء-سى – تۋىستىق قاتىناستاردى جوعالتۋ، 78ء-ى – بورىشكەرلەر جانە 104ء-ى – بالالارىنا اليمەنت تولەمەگەندەر بويىنشا»، - دەيدى سقو پد كوشى-قون قىزمەتى باسقارماسىنىڭ باستىعى تالعات ءابىلوۆ.