240 قۇقىق بۇزۋشى اكىمشىلىك جاۋاپكەرشىلىككە تارتىلدى
ىشكى ىستەر مينيسترلىگى مەرەكە قارساڭىندا شىرشانى زاڭسىز كەسۋگە جول بەرمەۋ ءۇشىن رەيدتى كۇشەيتتى. بۇل تۋرالى ىشكى ىستەر مينيسترلىگىنىڭ وكىلى شۇعىلا تۇرلىبەك اپتالىق بريفينگتە ايتتى، دەپ حابارلايدى Almaty-akshamy.kz Azattyq Rýhy-نا سىلتەمە جاساپ.
«15 جەلتوقساننان باستاپ رەسپۋبليكا اۋماعىندا قىلقان جاپىراقتى اعاشتاردى زاڭسىز كەسۋ، دايىنداۋ جانە وتكىزۋ ورىندارىن انىقتاۋ جانە جولىن كەسۋ بويىنشا ورمان قورعاۋ ورگاندارىمەن بىرگە رەيد جۇرگىزىلىپ جاتىر. اۆتوجولداردا، بازارلاردا جانە باسقا جەرلەردە باقىلاۋ ءۇشىن 500-گە جۋىق ءموبيلدى توپ قۇرىلدى، ولار 10 كۇندە مىڭنان استام رەيد جۇرگىزدى»، - دەدى ىشكى ىستەر مينيسترلىگىنىڭ وكىلى شۇعىلا تۇرلىبەك.
شىرشالار مەن قاراعايلاردىڭ ساتىلۋىن باقىلاۋ، ولاردى بەلگىلەنبەگەن جەرلەردە جانە ءتيىستى قۇجاتتارسىز ساتۋ بويىنشا تەكسەرۋلەر جۇرگىزىلەدى.
«قازىرگى ۋاقىتتا 235 زاڭ بۇزۋشىلىق انىقتالدى، ونىڭ ىشىندە 3 زاڭسىز كەسۋ، 45 قىلقان جاپىراقتى جاس كوشەتتى زاڭسىز ساتۋ فاكتىلەرى بار. 11 قىلمىستىق قۇقىقبۇزۋشىلىق تىركەلدى. 240 قۇقىق بۇزۋشى اكىمشىلىك جاۋاپكەرشىلىككە تارتىلدى، ونىڭ كوپشىلىگى شىرشا مەن قاراعايدى زاڭسىز كەسىپ تاسىمالداعان جانە ساتقان. قۇقىق بۇزۋشىلاردان 2،5 مىڭنان استام قىلقان جاپىراقتى اعاش تاركىلەندى. الدىن الۋ شاراسى جاڭا جىل مەرەكەسىنە دەيىن جالعاسادى»، - دەدى ش.تۇرلىبەك.