اسكەري قىزمەتشىلەرگە باستاپقى جارناسىز يپوتەكا بەرىلەدى

ۇكىمەت اسكەريلەرگە تۇرعىن ءۇي تولەمىن بەرۋ ءتارتىبىن قايتا قاراماق

وتباسى بانكى اسكەري قىزمەتشىلەرگە باستاپقى جارناسىز يپوتەكالىق كرەديت بەرۋ باعدارلاماسىن ازىرلەپ جاتىر. بۇل تۋرالى پرەمەر-مينيستر ءاليحان سمايىلوۆتىڭ سەنات دەپۋتاتتارىنىڭ ساۋالىنا بەرگەن جاۋابىندا جازىلعان، دەپ حابارلايدى Almaty-akshamy.kz inbusiness.kz-كە سىلتەمە جاساپ.

سەنات دەپۋتاتتارى ۇكىمەت باسشىسىنان كەلىسىمشارت بويىنشا اسكەري قىزمەتكە كەلگەندەرگە باسپانا الۋ ءۇشىن العاشقى جارنانىڭ سوماسىن تومەندەتۋ جانە تۇرعىن ءۇيدى جالداۋعا بولىنەتىن قاراجاتتى رەسپۋبليكا بويىنشا ءبىرىڭعايلاندىرۋدى سۇراعان ەدى.

"وتباسى بانك" اق اسكەري قىزمەتشىلەردىڭ تۇرعىن ءۇيدى ساتىپ الۋعا باستاپقى جارناسىنىڭ سوماسىن تومەندەتۋ ماقساتىندا اسكەري قىزمەتشىلەرگە باستاپقى جارناسىز يپوتەكالىق كرەديت بەرۋ باعدارلاماسىن ازىرلەۋدى جۇزەگە اسىرۋدا"، – دەپ جازىلعان ۇكىمەت باسشىسىنىڭ جاۋابىندا.

سونىمەن قاتار، ءاليحان سمايىلوۆ پرەزيدەنت اكىمشىلىگىنىڭ تاپسىرماسىمەن ۇكىمەت تۇرعىن ءۇي تولەمىن جۇزەگە اسىرۋ بويىنشا قولدانىستاعى تاسىلدەردى قايتا قارايتىنىن دا حابارلادى.

ەسكە سالايىق، قازىرگى تاڭدا اسكەري قىزمەتشىلەر "اسكەري باسپانا" تۇرعىن ءۇي باعدارلاماسى اياسىندا باسپانا الا الادى.