بيىل اليمەنت تولەمەگەندەرگە قاتىستى 7 قىلمىستىق، 15 شاقتى اكىمشىلىك ءىس قوزعالعان
الماتى وبلىسى تالعار قالاسىندا اليمەنت تولەمەي جۇرگەن اكەلەرگە جۇمىس جارمەڭكەسى وتكىزىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
جارمەڭكەگە كەلگەن 20 شاقتى ازاماتتىڭ جەتەۋى جۇمىسقا ورنالاستى. بيىل اليمەنت تولەمەي جۇرگەندەردىڭ بەرەشەگى 300 ميلليون تەڭگەدەن اسقان.
57 جاستاعى الماتى وبلىسىنىڭ تۇرعىنى مۇرات جايناقوۆ – ءۇش بالانىڭ اكەسى. وسىدان 2 جىل بۇرىن جارىمەن اجىراسقان. بالالارىنىڭ الدى كامەلەتتىك جاسقا تولعاندىقتان، تەك ءسۇت كەنجەسىنە عانا اليمەنت تولەيدى. تۇراقتى جۇمىسى بولماي، بالاسى الدىنداعى مىندەتىن ورىنداي الماي جۇرگەن. وسىدان 5 اي بۇرىن سوت ورىنداۋشىلارى ونى اۆتوبۋس جۇرگىزۋشىسى ەتىپ جۇمىسقا تۇرعىزىپتى. ال بۇگىن قوسىمشا تابىس تابۋ ءۇشىن جارمەڭكەگە كەلگەن.
«دۇرىس ەمەس. ءوز بالاسى عوي، اليمەنتتى تولەۋى كەرەك. ءوز باسىم بالالارىمنان قاشىپ تۇرعان جوقپىن. ۇيلەندىرەم. ومىرگە اكەلگەن سوڭ، باعۋ – مىندەتتىم»، – دەدى بورىشكەر مۇرات جايناقوۆ.
الماتى وبلىسىنا قاراستى تالعار اۋدانىندا بيىل اليمەنت تولەمەگەندەرگە قاتىستى 7 قىلمىستىق، 15 شاقتى اكىمشىلىك ءىس قوزعالعان. ونىڭ ۇشەۋىنە سوت ۇكىمى شىقتى. ال قالعاندارىنا قاتىستى تەرگەۋ جۇمىسى جالعاسىپ جاتىر.
«ءىس-شارانىڭ نەگىزگى ماقساتى – جۇمىسسىز بورىشكەرلەردى جۇمىسقا ورنالاستىرۋ جانە اليمەنت بويىنشا قارىز مولشەرىن ازايتۋ. كوپ بورىشكەر جۇمىسسىز. جۇمىسسىز بولۋىنا بايلانىستى اليمەنت تولەي المايدى. سول سەبەپتى دە جۇمىسپەن قامتۋ ءىس-شاراسى وتكىزىلەدى»، – دەدى ۇيىمداستىرۋشىلار.
ال پروكۋرورلار مەن سوت ورىنداۋشىلار ءتۇرلى سىلتاۋ ايتىپ، اليمەنت تولەۋدەن جالتارعاندارعا زاڭ قاتال ەكەنىن ەسكەرتەدى. بالاسىنا تيەسىلى قاراجاتتى 3 اي كەشىكتىرگەن اتا-اناعا قىلمىستىق جازا قاراستىرىلعان. ولار 2 جىلعا دەيىن باس بوستاندىعىنان ايىرىلۋى مۇمكىن.