ق ر پرەمەر-مينيسترى ءاليحان سمايىلوۆ ماسكەۋ قالاسىندا (رف) وتكەن تاۋەلسىز مەملەكەتتەر دوستاستىعى ۇكىمەتتەرى باسشىلارى كەڭەسىنىڭ كەزەكتى وتىرىسىنا قاتىستى، دەپ حابارلايدى Almaty-akshamy.kz
ۇكىمەت باسشىسى ءوز سوزىندە قازاقستان ينتەگراسيالىق بايلانىستاردى تەرەڭدەتۋ جانە ونى جاڭا پراكتيكالىق مازمۇنمەن تولىقتىرۋ ءۇشىن تمد الاڭىندا ودان ءارى بىرلەسىپ جۇمىس ىستەۋگە مۇددەلى ەكەنىن اتاپ ءوتتى.
«مەملەكەتتەر باسشىلارى كەڭەسىنىڭ وتكەن وتىرىسىندا ق ر پرەزيدەنتى قاسىم-جومارت توقايەۆ ۇسىنعان باسىمدىقتار تمد فورماتىنداعى ءوزارا ءىس-قيمىلدى كۇشەيتۋگە باعىتتالعان. ەڭ باستىسى – تۋىنداعان سىن-قاتەرلەردى ەڭسەرۋ، ءتيىمدى ارىپتەستىكتى نىعايتۋ ءۇشىن جاڭا باعىتتار ىزدەۋ»، — دەدى ءاليحان سمايىلوۆ.
ماسەلەن، كەلەر جىلى بىرلەسكەن جۇمىستىڭ نەگىزگى باعىتتارىنىڭ ءبىرى مادەني-گۋمانيتارلىق بايلانىستاردى، سونداي-اق دەنساۋلىق ساقتاۋ، ءبىلىم جانە سپورت سالالارىنداعى ءوزارا ءىىنتىماقتاستىقتى كەڭەيتۋ بولماق.
پرەمەر-مينيستر قازاقستان 2024 جىلدىڭ تمد ەلدەرىندە ۆولونتەرلىك قوزعالىس جىلى دەپ جاريالانۋىن قۇپتايتىنىن اتاپ ءوتتى.
«بۇگىندە دوستاستىق ەلدەرىنىڭ ەرىكتىلەرى وزدەرىنىڭ تىنىمسىز ەڭبەكتەرىنىڭ ارقاسىندا تولەرانتتى قوعامنىڭ دامۋىنا، قايىرىمدىلىق پەن مەيىرىمدىلىك مادەنيەتىن قولداۋعا ەلەۋلى ۇلەس قوسۋدى جالعاستىرىپ كەلەدى. دوستاستىق ەلدەرى ەرىكتىلەرىنىڭ جىل سايىنعى فورۋمىن وتكىزۋ جانە وعان تمد-نىڭ تۇراقتى الاڭى مارتەبەسىن بەرۋ تۋرالى قازاقستاندىق باستامانى ىسكە اسىرۋ بويىنشا ناقتى جۇمىستاردى باستاۋعا شاقىرامىن»، — دەدى ۇكىمەت باسشىسى.
دەنساۋلىق ساقتاۋ سالاسىنداعى ىنتىماقتاستىقتى تەرەڭدەتۋ تۋرالى ايتا كەلە، ءاليحان سمايىلوۆ دەنە شىنىقتىرۋ جانە سپورت سالاسىندا اتقارىلىپ جاتقان جۇمىستاردىڭ ماڭىزدىلىعىنا توقتالدى.
بيىل مۇمكىندىگى شەكتەۋلى بالالار اراسىندا تمد ەلدەرىنىڭ سپارتاكيادالارى جانە تمد چەمپيوناتتارىن وتكىزۋ ءۇشىن ۇيىمداستىرۋ-قۇقىقتىق نەگىزىن قۇرۋ اتالعان باعىتتاعى ۇلكەن جەتىستىك بولىپ وتىر.
«قازاقستان بۇل جۇمىستى قولدايدى جانە الداعى جارىستارعا بەلسەندى قاتىسۋدى جوسپارلاپ وتىر»، — دەدى ۇكىمەت باسشىسى.
ونىڭ ايتۋىنشا، ءوزارا ءىس-قيمىلدىڭ تاعى ءبىر ماڭىزدى باعىتى – دوستاستىق ەلدەرىنىڭ ازاماتتارىنا ساپالى ءارى قولجەتىمدى مەديسينالىق كومەك كورسەتۋ.
«تمد شەڭبەرىندە ازىرلەنگەن دەنساۋلىق ساقتاۋ سالاسىنداعى ىنتىماقتاستىق تەتىكتەرى كەڭ اۋقىمدى كوروناۆيرۋستىق پاندەميانى ەڭسەرۋگە ىقپال ەتتى. سونىمەن قاتار ءبىزدىڭ ەلدەر ءقازىر تاعى دا كەڭ تارالعان اۋرۋلارمەن بەتپە-بەت كەلىپ وتىر، ونىڭ ىشىندە قىزىلشا ىندەتىنىڭ ءورشۋىن ەرەكشە اتاپ وتۋگە بولادى. وسىعان وراي دەنساۋلىق ساقتاۋ سالاسىنداعى ىنتىماقتاستىق جونىندەگى كەڭەستى قوسا العاندا، تمد-داعى بارلىق ءوزارا ءىس-قيمىل تەتىكتەرىن جانداندىرۋعا شاقىرامىز»، — دەدى پرەمەر-مينيستر.
ونىڭ ايتۋىنشا، قازاقستان دۇنيەجۇزىلىك دەنساۋلىق ساقتاۋ ۇيىمىنىڭ قولداۋىمەن العاشقى مەديسينالىق-سانيتاريالىق كومەك بويىنشا ەلدەر كواليسياسىن قۇرۋدى ۇسىندى.
«بۇل اۋرۋدىڭ الدىن الۋ جانە دەنساۋلىقتى قورعاۋ قاعيداتتارىن ىلگەرىلەتۋگە، بىرلەسكەن ۇسىنىستار ازىرلەۋگە مۇمكىندىك بەرەدى»، — دەپ باسا ايتتى ءاليحان سمايىلوۆ.
جيىن سوڭىندا پرەمەر-مينيستر تمد ەلدەرىنىڭ مادەنيەت سالاسىنداعى كوپجوسپارلى ءوزارا ءىس-قيمىلدى دامىتۋ جونىندەگى جالپى تاسىلدەرى مادەني ىنتىماقتاستىق پەرسپەكتيۆالارى تۋرالى مالىمدەمەنىڭ جوباسىندا كورسەتىلگەنىن اتاپ ءوتتى.
«ءبىز اتالعان قۇجاتتى 2022 جىلعى 14 قازاندا استانادا وتكەن تمد سامميتىندە قابىلدانعان ەلدەرىمىزدىڭ باسشىلارىنىڭ مادەنيەت سالاسىنداعى ىنتىماقتاستىق تۋرالى مالىمدەمەسىن دامىتۋ رەتىندە قابىلدايمىز»، — دەپ تۇيىندەدى ءسوزىن ءاليحان سمايىلوۆ.