ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا قىزىلشامەن سىرقاتتانۋشىلىقتىڭ كۇرت ءوسۋى كۇن تارتىبىنەن تىس قارالدى.
دەنساۋلىق ساقتاۋ ءمينيسترى اجار عينيات حابارلاعانداي، قىزىلشا اۋرۋىنىڭ اسقىنۋى بويىنشا الەمنىڭ 167 ەلىندە 415 مىڭنان استام جاعداي تىركەلگەن. ەلىمىزدە قىزىلشانىڭ 17 مىڭنان استام جاعدايى تىركەلدى. ولاردىڭ 82%-دان استامى بالالارعا تيەسىلى، ونىڭ كوپشىلىگى ۆاكسينا الماعان بالالار.
قىزىلشا اۋرۋلارى بارلىق وڭىرلەردە تىركەلدى، جوعارى دەڭگەي شىمكەنت پەن الماتى قالالارىندا، جامبىل، الماتى، ماڭعىستاۋ، اقتوبە، قىزىلوردا جانە اتىراۋ وبلىستارىندا بايقالادى، دەپ حابارلايدى Almaty-akshamy.kz.
ۇيىمداسقان ۇجىمداردا بالالاردىڭ جينالۋىنا بايلانىستى بيىلعى قىركۇيەك ايىنان باستاپ سىرقاتتانۋشىلىقتىڭ كۇرت ءوسۋى بايقالا باستادى. ناتيجەسىندە سىرقاتتانۋشىلىق دەڭگەيى ەكى ەسەگە ءوستى. قاراشا ايىندا قىزىلشانىڭ 6 مىڭنان استام جاعدايى تىركەلدى.
بۇگىنگى تاڭدا ەلىمىزدە قىزىلشامەن اۋىرعان ناۋقاستار ءۇشىن ينفەكسيالىق اۋرۋحانالاردا 3،5 مىڭنان استام توسەك-ورىن ورنالاستىرىلعان، ستاسيونارلىق ەمدەۋدە 2375 بالا ەم الۋدا. بۇگىنگى تاڭدا توسەك ورىنمەن قامتۋ جۇكتەمەسى – 59،5%-دى قۇرايدى، 1 مىڭنان استام ورىن رەزەرۆتە تۇر. ەمدەۋگە جاتقىزىلعانداردىڭ ىشىندە 30 بالا رەانيماسيا بولىمشەلەرىندە اۋىر جاعدايدا جاتىر، 1 جاسقا دەيىنگى – 15 بالا بار.
قىزىلشا بويىنشا جاعدايدى تۇراقتاندىرۋ ماقساتىندا 1 جاستان 6 جاسقا دەيىنگى 600 مىڭنان استام بالا جوسپارلى يممۋنداۋمەن قامتىلدى، بۇل ۆاكسينالاناتىنداردىڭ 84%-ىن قۇرايدى. بۇل ددۇ ۇسىنىمىنا سايكەس كەلەدى. جىل سوڭىنا دەيىن وسى جاس ارالىعىنداعى 100 مىڭنان استام بالانى قامتۋ جوسپارلانىپ وتىر.
اۋرۋ وشاقتارىندا 15،4 مىڭنان استام ادام شۇعىل ۆاكسينالاۋمەن قامتىلدى. سونداي-اق 18 جاسقا دەيىنگى بۇرىن ەگىلمەگەن 63،2 مىڭ بالالارعا ۆاكسيناسيا جۇرگىزىلدى. سونىمەن قاتار ناۋقاستاردىڭ 65%-ى 5 جاسقا دەيىنگى بالالارعا تيەسىلى ەكەنىن ەسكەرە وتىرىپ، قاراشا ايىنان باستاپ 1 جاسقا دەيىنگى بالالاردى، سونداي-اق 2 جاستان 4 جاسقا دەيىنگى بالالاردى قوسىمشا جاپپاي يممۋنداۋ باستالدى، 94 مىڭ ادام قامتىلدى. بيىل بارلىعى 770 مىڭنان استام بالا ەگىلدى.
سونىمەن قاتار قىزىلشاعا قارسى ۆاكسينانىڭ قوسىمشا 1،5 ملن دوزاسى ساتىپ الىندى. بۇگىنگى تاڭدا 500 مىڭ دوزا كەلىپ ءتۇستى، جەلتوقسان ايىندا 1 ملن دوزا جەتكىزىلەدى دەپ كۇتىلۋدە. جالپى، قوسىمشا يممۋنداۋدىڭ تيىمدىلىگى 2005، 2015 جانە 2019 جىلدارداعى قىزىلشانىڭ الدىڭعى ءورشۋى كەزىندە دالەلدەندى.
پرەمەر-مينيستر ەلىمىزدە اۋرۋدىڭ تارالۋىن مۇمكىندىگىنشە تەزىرەك توقتاتۋ كەرەكتىگىن اتاپ ءوتتى.
«قىزىلشا اسقىنىپ كەتسە، بالالاردىڭ دەنساۋلىقتارىنا اسا ءقاۋىپ توندىرەدى. سوندىقتان، ونىمەن تەك دەنساۋلىق ساقتاۋ جۇيەسى عانا ەمەس، بۇكىل قوعام بولىپ، كۇرەسۋىمىز قاجەت. بالا دەنساۋلىعى باستى نازاردا بولۋى ءتيىس»، — دەدى ءاليحان سمايىلوۆ.
ۇكىمەت باسشىسى ۆاكسينا الۋدان باسقا، مۇنداي ءقاۋىپتى ۆيرۋسپەن باسقاشا كۇرەسۋ مۇمكىن ەمەس ەكەنىن اتاپ ءوتتى جانە ءتيىستى جۇمىستى كۇشەيتۋدى تاپسىردى.
«دەنساۋلىق ساقتاۋ مينيسترلىگى مەن اكىمدىكتەر ۆاكسينا الۋدىڭ قاجەتتىلىگى تۋرالى ءاقپاراتتىق-تۇسىندىرۋ جۇمىستارىن كۇشەيتۋ كەرەك. بارلىق اكىمدەر ۆاكسينالاۋ ماسەلەسىن جەكە باقىلاۋدا ۇستاپ، دەنساۋلىق ساقتاۋ مينيسترلىگىمەن بىرگە جۇمىستى ۇيلەستىرۋى قاجەت»، — دەدى پرەمەر-مينيستر.