قازاقستاننىڭ 3200 شاقىرىم جولىندا اقىلى جۇيە جۇمىس ىستەيدى. وتاندىق تاسىمالداۋشىلار ءۇشىن اي سايىنعى جانە جىلدىق ابونەنتتىك تولەم كوزدەلگەن. بۇل تۋرالى ق ر كولىك ءمينيسترى مارات قارابايەۆ ايتىپ بەردى، دەپ حابارلايدى اlmaty-akshamy.kz.
مينيستر جىل سايىن ەلىمىزدەگى جولداردى كۇتىپ ۇستاۋعا 60 ملرد تەڭگە كولەمىندە قارجى قاجەت بولاتىنىن ايتتى.
«وسى ورايدا رەسپۋبليكالىق بيۋدجەتكە سالماقتى ازايتۋ ماقساتىندا اقىلى جولدار كولەمىن كەزەڭ-كەزەڭىمەن ەنگىزۋدەمىز. قازىرگى تاڭدا 3 200 شاقىرىمدا اقىلى جۇيە ەنگىزىلگەن. 11 ايدىڭ قورىتىندىسى بويىنشا 26 ملرد 500 ملن تەڭگە قاراجات ءتۇستى»، - دەدى مارات قارابايەۆ ۇكىمەتتىڭ بۇگىنگى وتىرىسىندا.
ونىڭ ايتۋىنشا، كەلەسى جىلى قوسىمشا 1 200 شاقىرىمعا اقىلى جۇيە ەنگىزۋدى جوسپارلانىپ وتىر.
«جالپى 2029 جىلعا دەيىن رەكونسترۋكسيالاۋ جۇمىستارىنىڭ اياقتالۋىنا قاراي، مۇنداي جولدار كولەمى 11 مىڭ شاقىرىمعا جەتكىزىلەدى. بۇل رەتتە قازاقستانداعى اقىلى جول تاريفتەرى جاقىن جانە الىس شەت ەلدەرمەن سالىستىرعاندا ەڭ تومەن ەكەنىن ايتا كەتكەن ءجون»، - دەيدى مارات قارابايەۆ.
سوڭعى ۋاقىتتا ترانزيتتىك اعىننىڭ وسۋىنە بايلانىستى، جوندەلگەن جولداردى نورماتيۆتىك جاعدايدا ساقتاۋ ءۇشىن جول اقىسىن قايتا قاراۋ جۇمىستارى جۇرگىزىلىپ جاتىر.
«اقىلى جۇيە ءبىرىنشى كەزەكتە ترانزيتتىك كولىك قۇرالدارىنان قاراجات جيناۋعا باعىتتالعانىن ەسكەرىپ، وتاندىق تاسىمالداۋشىلار ءۇشىن اي سايىنعى جانە جىلدىق ابونەنتتىك تولەم كوزدەلگەن»، - دەدى م.قارابايەۆ.
ايتا كەتەيىك، بيىل حالىقتىڭ شاعىمىن ەسكەرە وتىرىپ، بارلىق كۇش قۇرىلىسى ۇزاققا سوزىلعان 6 نەگىزگى جوباعا باعىتتالدى. بۇل – تالدىقورعان-وسكەمەن، قاراعاندى-الماتى، مەركە-بۋرىلبايتال، اقتوبە-قاندىاعاش جانە اتىراۋ-استراحان جولدارى.