ءاليحان سمايىلوۆ جولداردىڭ ساپاسىن سىنعا الدى
پرەمەر-مينيستر ءاليحان سمايىلوۆتىڭ توراعالىعىمەن وتكەن مەملەكەت باسشىسىنىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتاب وتىرىسىندا اۆتوموبيل جولدارىن سالۋ جانە رەكونسترۋكسيالاۋ ماسەلەلەرى قارالدى، دەپ حابارلايدى اlmaty-akshamy.kz ۇكىمەتتىڭ تەلەگرام كانالىنا سىلتەمە جاساپ.
2030 جىلعا دەيىن 8 مىڭ شاقىرىم رەسپۋبليكالىق جانە 14 مىڭ شاقىرىم جەرگىلىكتى اۆتوجولداردى ساپالى سالۋ مەن رەكونسترۋكسيالاۋ مىندەتى قويىلعان.
بيىل 11 مىڭ شاقىرىم اۆتوموبيل جولدارى، ونىڭ ىشىندە 7 مىڭ شاقىرىم رەسپۋبليكالىق جەلى جوندەۋ جۇمىستارىمەن قامتىلادى.
بۇگىنگى تاڭدا 70 مىڭ شاقىرىم جەرگىلىكتى جولداردىڭ 85%-نىڭ جاعدايى قالىپتى.
جامبىل (97%)، ماڭعىستاۋ (96%) جانە پاۆلودار (91%) وبلىستارىندا جەرگىلىكتى جولداردىڭ جاي-كۇيى جاقسى.
ەلىمىزدىڭ ءۇش وڭىرىندە كورسەتكىشتەر ورتاشادان تومەن: باتىس قازاقستان (46%)، اقتوبە (72%) جانە اتىراۋ (72%) وبلىستارىندا.
ۇكىمەت باسشىسى سوڭعى ۋاقىتتا اۆتوموبيل جولدارىنىڭ ساپاسىنا قاتىستى شاعىمدار كوپ ەكەنىن اتاپ ءوتتى. جولدىڭ ناشارلىعى جول اپاتىنا سەبەپشى بولىپ، ادامداردىڭ ولىمىنە اكەلەدى، ترانزيتتىك تاسىمال كولەمىن ازايتادى، سونىمەن قاتار ەلدىڭ يميدجىنە تەرىس اسەر ەتەدى.
«جۇرگىزىلىپ جاتقان جوندەۋ جۇمىستارىنا جۇرتشىلىق قاناعاتتانباي وتىر. ينتەرنەتتە جۇمىستىڭ رەگلامەنت بويىنشا ەمەس، جاڭبىر، ءتىپتى قار جاۋىپ جاتقان كەزدە جۇرگىزىلىپ جاتقانى تۇسىرىلگەن كوپتەگەن بەينەروليك پەن فوتوسۋرەتتەر تولىپ ءجۇر»، — دەدى ءاليحان سمايىلوۆ.
مىسال رەتىندە ۇكىمەت باسشىسى اباي وبلىسى كوكتەرەك اۋىلىندا قاردىڭ ۇستىنە اسفالت توسەلگەنىن، ال پاۆلودار وبلىسىندا اسفالتتى جولعا شاشىپ تاستاعانىن ايتتى. كەيبىر وڭىرلەردە اۋىل تۇرعىندارى جەرگىلىكتى اتقارۋشى ورگانداردان قايىر كۇتپەي، جولداردى ءوز بەتىنشە جوندەيتىن جاعدايلار كەزدەسەدى. الماتى وبلىسى رىسقۇلوۆ اۋىلىندا، ماڭعىستاۋ وبلىسى اتامەكەن اۋىلىندا وسىنداي جاعدايلار ورىن الدى. سونىمەن قاتار ءبىر ۋچاسكەدە جىل سايىن جوندەۋ جۇمىستارى جۇرگىزىلگەن فاكتىلەر بار.
ءاليحان سمايىلوۆ جول سالۋ ادىستەرىن تۇبەگەيلى وزگەرتۋدى تالاپ ەتتى.
سونىمەن قاتار پرەمەر-مينيستر وسى جىلدىڭ سوڭىنا دەيىن «مەركە-بۋرىلبايتال»، «اقتوبە-اتىراۋ-استراحان»، «الماتى-وسكەمەن»، «ونەگە-بەيسەن»، «كازتالوۆكا-جانىبەك»، «ءۇشارال-دوستىق» سياقتى ماڭىزدى اۆتوجول جوبالارىنىڭ اياقتالۋىن قامتاماسىز ەتۋدى تاپسىردى.
