گۋمانيتارلىق كومەك الەپپو قالاسىنا قازاقستان ۇلتتىق گۆاردياسىنىڭ ءتورت رەيسىمەن اتتاندى.
قازاقستان ازىق-تۇلىك قاۋىپسىزدىگى جونىندەگى يسلام ۇيىمىنىڭ (IOFS) قولداۋىمەن جەر سىلكىنىسىنەن زارداپ شەككەن سيرياعا 50 توننا گۋمانيتارلىق كومەك جەتكىزدى، دەپ حابارلايدى اlmaty-akshamy.kz
اتاپ ايتقاندا، قازاقستان مەملەكەتتىك رەزەرۆتەن كونسەرۆىلەر، جىلى كيىم، قىسقى شاتىرلار، توسەك-ورىن جانە توسەك جابدىقتارىن جونەلتتى. گۋمانيتارلىق كومەك الەپپو قالاسىنا قازاقستان ۇلتتىق گۆاردياسىنىڭ ءتورت رەيسىمەن جەتكىزىلدى.
IOFS باس ديرەكتورى ەرلان بايداۋلەت قازاقستان پرەزيدەنتى قاسىم-جومارت توقايەۆتىڭ تاپسىرماسىمەن جۇكتىڭ جەتكىزىلۋىن باقىلاۋ ءۇشىن سيرياعا ءوزى اتتاندى.
جۇكتى تاپسىرۋ راسىمىنە الەپپو گۋبەرناتورىنىڭ ورىنباسارى ابدەل كادەر داۆااليبي، الەپپو اۋەجايىنىڭ ديرەكتورى مۇحاممەد ءال-ماسري، سيريا قىزىل جارتى اي ۇيىمىنىڭ وكىلدەرى سامير شۋبۋكي، احماد سامۋن، اناس ساماا، سونداي-اق قازاقستاننىڭ ليۆانداعى ەلشىسى راسۋل جۇمالى قاتىستى.
قابىلداۋشى ەلدىڭ اتىنان ءسوز العان الەپپو گۋبەرناتورىنىڭ ورىنباسارى ابدەل كادەر داۋااليبي قازاقستان حالقىنا شەكسىز العىسىن ءبىلدىردى. ونىڭ ايتۋىنشا، قيىن-قىستاۋ كەزەڭدە قول ۇشىن سوزىپ، كومەك كورسەتكەن قازاق حالقى ەشقاشان ۇمىتىلمايدى.
«سيريا، تۇركيا جانە باسقا دا ەلدەردە جەر سىلكىنىسىنەن زارداپ شەككەندەردىڭ وتباسىلارىنا قايعىرىپ كوڭىل ايتامىن. ءبىزدىڭ كوماندا جاعداي تەزىرەك شەشىلەدى دەپ ۇمىتتەنىپ، ەرجۇرەك قۇتقارۋشىلارعا قاجىرلى ەڭبەگى ءۇشىن شىن جۇرەكتەن العىس بىلدىرەدى»، - دەدى IOFS باس ديرەكتورى ە. بايداۋلەت.