ينفلياسيا دەڭگەيىن باقىلاۋ جانە ونى تومەندەتۋگە قاتىستى جاڭا شارالار كەشەنى ازىرلەندى. بۇل تۋرالى ۇكىمەت وتىرىسىندا ق ر پرەمەر-مينيسترى ءاليحان سمايىلوۆ ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«پرەزيدەنت بيۋدجەتتىڭ كىرىس بولىگىن ۇلعايتۋ ماسەلەسىن اتاپ كورسەتتى. قازىرگى تاڭدا تاۋ-كەن سەكتورىندا پايدالى قازبالاردى وندىرۋگە سالىناتىن سالىق مولشەرلەمەسىن، مۇناي ونىمدەرىن وندىرۋشىلەرگە ارنالعان اكسيزدەردى، جەر قويناۋىن پايدالانۋشىلاردىڭ ديۆيدەنتتەرى بويىنشا جەڭىلدىكتەردى جانە ترانسفەرتتىك باعا بەلگىلەۋ ءتارتىبىن قايتا قاراۋ بويىنشا ۇسىنىستار دايىن بولدى. ۇلتتىق ەكونوميكا جانە قارجى مينيسترلىكتەرى وسى ۇسىنىستاردى جۇرتشىلىق پەن بيزنەسكە كەڭىنەن ءتۇسىندىرىپ، ولاردىڭ تەز ارادا زاڭ جۇزىندە بەكىتىلۋىن قامتاماسىز ەتۋى قاجەت»، - دەدى ۇكىمەت باسشىسى.
سونىمەن قاتار ول ماينينگ سالاسىنىڭ پروبلەمالىق ماسەلەلەرىن شۇعىل رەتتەۋ قاجەتتىگىنە نازار اۋدارتتى.
«قازىرگى كەزدە ۇكىمەت ماينينگ تاسىلدەرىن قايتا قاراپ جاتىر. بۇل سالانى رەتتەۋ جانە دامىتۋ ءۇشىن سيفرلىق دامۋ مينيسترلىگى مۇددەلى مەملەكەتتىك ورگاندارمەن بىرلەسىپ، بارلىق ماسەلەلەردى ءماجىلىس دەپۋتاتتارى باستاماشى بولعان «سيفرلىق اكتيۆتەر تۋرالى» زاڭ جوباسى اياسىندا پىسىقتاۋى قاجەت»، - دەدى پرەمەر-مينيستر.
سونىمەن قاتار ۇكىمەت باسشىسى پرەزيدەنت تاپسىرماسىنا سايكەس، ينفلياسيا دەڭگەيىن باقىلاۋ جانە ونى تومەندەتۋگە قاتىستى جاڭا شارالار كەشەنى ازىرلەنگەنىن ايتتى.
«ول ەگىس القاپتارىن كوبەيتۋ جانە ازىق-تۇلىك ونىمدەرىن ءوندىرۋ مەن وڭدەۋ سالاسىنداعى ينۆەستيسيالىق جوبالاردى ىسكە اسىرۋ ارقىلى وتاندىق ءوندىرىستى ۇلعايتۋعا باعىتتالعان. سونىمەن قاتار جانار-جاعارماي ماتەريالدارىن ءوندىرۋ مەن ولاردى ءبولۋ جۇيەسىن رەفورمالاۋ بويىنشا جۇيەلى شارالار قابىلداناتىن بولادى. سونداي-اق باعانى بەلگىلەۋگە باقىلاۋ جاساۋ جانە مونوپولياعا قارسى رەتتەۋ شارالارى كوزدەلىپ وتىر. قابىلدانىپ جاتقان شارالار باعانى بىرتىندەپ تۇراقتاندىرۋعا، ينفلياسيانى نىسانالى دەڭگەيدە ۇستاپ تۇرۋعا، جانە بيزنەس احۋالدى جاقسارتۋعا ىقپال ەتەدى. وسىعان وراي ينفلياسيا دەڭگەيىن باقىلاۋ جانە تومەندەتۋ بويىنشا شارالار كەشەنىن ماقۇلداۋدى ۇسىنامىن»، - دەدى ول.
پرەمەر-مينيستر مەملەكەتتىك ورگانداردىڭ ءبىرىنشى باسشىلارى مەن اكىمدەرگە اتالعان ءىس-شارالاردىڭ ساپالى جانە ءتيىمدى ورىندالۋىن ەرەكشە باقىلاۋعا الۋدى تاپسىردى.
«شارالار كەشەنىنىڭ ورىندالۋ بارىسىن ۇكىمەتتە تۇراقتى تۇردە قارايتىن بولامىز. جالپى مەملەكەتتىك جانە كۆازيمەملەكەتتىك سەكتوردىڭ ساتىپ الۋىن جەتىلدىرۋ بويىنشا ۇسىنىلعان شارالاردى قولدايمىز. قارجى مينيسترلىگى «سامۇرىق-قازىنا» قورىمەن بىرلەسىپ، وسى ۇسىنىستاردى زاڭ جۇزىندە بەكىتۋ ماسەلەسىن جىلدامداتىپ پىسىقتاسىن»، - دەدى ءاليحان سمايىلوۆ.