ق ر پرەمەر-مينيسترى ءاليحان سمايىلوۆ پەن ەۋروپالىق كوميسسيانىڭ ۆيسە-پرەزيدەنتى ماروس شەفچوۆيچ قازاقستان مەن ەۋروپالىق وداق اراسىنداعى ساۋدا، ينۆەستيسيا، ەنەرگەتيكا، كولىك جانە لوگيستيكا سالالارىنداعى ىنتىماقتاستىقتى نىعايتۋ ماسەلەلەرىن تالقىلادى.
پرەمەر-مينيستر قازاقستان ەۋروپالىق وداقپەن ينۆەستيسيالىق سەرىكتەستىكتى ودان ءارى تەرەڭدەتۋگە جانە ءوزارا ساۋدانى ءارتاراپتاندىرۋعا مۇددەلى ەكەنىن اتاپ ءوتتى. سونىمەن قاتار سوڭعى جىلدارى اسا ماڭىزدى شيكىزات سالاسىنداعى ىنتىماقتاستىقتى دامىتۋ ماسەلەسى دە وزەكتى بولىپ وتىر.
ءاليحان سمايىلوۆ بىلتىر COP-27 كونفەرەنسياسى اياسىندا ەۋروكوميسسيا باسشىسى ۋرسۋلا فون دەر ليايەنمەن بىرگە وسى باعىتتاعى ىنتىماقتاستىق تۋرالى مەموراندۋمعا قول قويىلعانىن ەسكە سالدى. ال بىرنەشە اپتا بۇرىن الماتىدا ەۋروپالىق كوميسسيانىڭ ۆيسە-پرەزيدەنتى ۆالديس دومبروۆسكيسپەن وسى مەموراندۋمدى جۇزەگە اسىرۋ بويىنشا جول كارتالارىمەن الماسۋ شاراسى ءوتتى.
«قۇجات ەكونوميكانىڭ ناقتى سەكتورلارىنداعى ارىپتەستىگىمىزدى نىعايتۋ بويىنشا ناقتى شارالاردى كوزدەيدى، ونىڭ نەگىزگى ەلەمەنتى «جاسىل» تەحنولوگيالاردى ەنگىزۋ بولىپ تابىلادى. بۇل وسى سالاداعى ورتاق ماقساتتارىمىزدى جۇزەگە اسىرۋعا قوسىمشا سەرپىن بەرەتىنى ءسوزسىز»، — دەدى پرەمەر-مينيستر.
ءوز كەزەگىندە ماروش شەفچوۆيچ ەۋروپالىق وداقتىڭ بۇعان دەيىن قول جەتكىزىلگەن بارلىق ۋاعدالاستىقتى جۇزەگە اسىرۋدى جالعاستىرۋعا دايىن ەكەنىن اتاپ ءوتتى.
«مەنىڭ رەسپۋبليكاعا ساپارىم ەۋروپالىق وداقتا قازاقستاندى اسا ماڭىزدى ستراتەگيالىق سەرىكتەس رەتىندە كورەتىنىمىزدى دالەلدەيدى. ءبىز ءوزارا تاۋار اينالىمىنىڭ ارتقانىنا قۋانىشتىمىز جانە ءسىزدىڭ ەلدەگى ەڭ ءىرى ينۆەستورلاردىڭ ءبىرى بولعانىمىزدى ماقتانىش تۇتامىز. مەنىڭ ساپارىمدا سىزدەردىڭ مينيسترلەرىڭىزبەن كەزدەسۋلەردىڭ بارلىعى ءساتتى ءوتتى. ءبىز بىرلەسە جۇمىس ىستەۋگە بولاتىن ورتاق جوبالاردى تالقىلادىق. بارىنشا تىعىز ىنتىماقتاستىقتى ءارى قاراي نىعايتۋ – ءبىزدىڭ كۇن تارتىبىمىزدە تۇرعان نەگىزگى ماسەلەلەردىڭ ءبىرى»، — دەدى ماروش شەفچوۆيچ.