وسكەمەندە فاستفۋدتان جەتى ادام ۋلانىپ اۋرۋحاناعا ءتۇستى
شقو سانيتاريالىق-ەپيدەميولوگيالىق باقىلاۋ دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وسكەمەندە ستافيلوكوكك ينفەكسياسى بار شاۋرمانى جەگەن 7 ادام ۋلانىپ، اۋرۋحاناعا تۇسكەن. ولار شاۋرمانى قالا كوشەلەرىنىڭ بىرىندە تۇرعان پاۆيلوننان ساتىپ العان.
«دەپارتامەنتكە ءبىر تاۋلىك ىشىندە بىردەي بەلگىلەرمەن اۋرۋحاناعا تۇسكەندەر تۋرالى جەتى جەدەل حابارلاما جەتتى. بارلىعى ءجيى قۇسىپ، دەنە قىزۋى كوتەرىلىپ، ۇلكەن دارەتكە كوپ باردى. كلينيكالىق دەرەكتەر نەگىزىندە دارىگەرلەر بارلىق ناۋقاسقا «تاماقتان ۋلانۋ» دياگنوزىن قويدى»، - دەلىنگەن اقپاراتتا.
5 ادام اۋرۋحاناعا جاتقىزىلسا، ەكەۋى امبۋلاتورلىق ەم قابىلدادى. قازىرگە ۋاقىتتا پاسيەنتتەر تولىقتاي جازىلىپ شىققان.
«جۇرگىزىلگەن ەپيدەميولوگيالىق تەكسەرۋ بارىسىندا انىقتالعانداي، بارلىق ۋلانۋ جاعدايى وسكەمەندەگى فاستفۋد نىسانىنان ساتىپ الىنعان شاۋرمادان بولعان. سول پاۆيلون ونىمدەرىن تەكسەرۋ ناتيجەسىندە شاۋرما سىناماسىنان «S.aureus 2*103 KOE/گ» انىقتالدى. بۇل ستافيلوكوكك ينفەكسياسى. ونىمدە ستافيلوكوككتىڭ قايدان پايدا بولعانى بەلگىسىز. پاۆيلون قىزمەتكەرلەرىنەن اتالعان ينفەكسيا تابىلمادى»، - دەيدى دەپارتامەنت باسشىسى عالىمبەك الين.
دەگەنمەن فاستفۋد نىسانى جۇمىسىنان باسقا بۇزۋشىلىقتار تىركەلدى. اتاپ ايتقاندا، ونىمدەردى تاسىمالداۋ شارتتارى ساقتالماعان، تاماق ونىمدەرىنىڭ قاۋىپسىزدىگىن راستايتىن ىلەسپە قۇجاتتار بولماعان، پاۆيلون ىشىندە جاندىكتەر جۇرگەن. دەزينسەكسيالاۋ جانە دەراتيزاسيالاۋ جۇمىستارى جۇرگىزىلگەنىن راستايتىن قۇجات تا جوق بولىپ شىقتى. كاسىپ يەسى اتالعان بۇزۋشىلىقتارعا جويۋعا مىندەتتەلدى. تەك سودان كەيىن عانا نىسان جۇمىسىن جالعاستىرا الادى.