UNFPA جاڭا باستامالاردى جۇزەگە اسىرۋدا
ق ر پرەمەر-مينيسترى ءاليحان سمايىلوۆ بىرىككەن ۇلتتار ۇيىمى باس حاتشىسىنىڭ ورىنباسارى، UNFPA اتقارۋشى ديرەكتورى ناتاليا كانەممەن كەزدەسۋ وتكىزدى، دەپ حابارلايدى Almaty-akshamy.kz.
تاراپتار ق ر الەۋمەتتىك سالاسىن، ونىڭ ىشىندە ءبىلىم بەرۋ مەن دەنساۋلىق ساقتاۋدى دامىتۋ، جاستاردى قولداۋ جونىندەگى باستامالاردى، سونداي-اق الماتىدا UNFPA كوشباسشىلارىنىڭ جاھاندىق كەزدەسۋىن وتكىزۋ ماسەلەلەرىن تالقىلادى.
پرەمەر-مينيستر ۇكىمەت بۇۇ-مەن، اتاپ ايتقاندا، الەۋمەتتىك سالادا حالىقارالىق وزىق تاجىريبەلەر مەن داعدىلاردى ىسكە اسىرۋمەن اينالىساتىن حالىقتىڭ قونىستانۋى سالاسىنداعى قورىمەن (UNFPA) قارىم-قاتىناستاردى جان-جاقتى دامىتۋعا ۇلكەن ءمان بەرەتىنىن اتاپ ءوتتى.
«ءبىزدىڭ بىرلەسكەن جۇمىسىمىزعا ولشەۋسىز ۇلەس قوستىڭىز جانە ءبىز ورتاق ماقساتتارعا قول جەتكىزۋگە باعىتتالعان كۇش-جىگەرىمىزدى جوعارى باعالايمىز»، — دەدى ءاليحان سمايىلوۆ.
سونىمەن بىرگە ول بۇۇ مەن قازاقستان اراسىنداعى ىنتىماقتاستىقتىڭ نەگىزگى قاعيداتتارى مەن باسىمدىقتارى 2021-2025 جىلدارعا ارنالعان نەگىزدەمەلىك باعدارلامادا ايقىندالعانىن، ونى جۇزەگە اسىرۋ قازاقستانعا ناقتى وڭ ناتيجەلەر بەرىپ وتىرعانىن ايتتى.
«بۇعان جاستاردى قولداۋ، گەندەرلىك تەڭدىك جانە الەۋمەتتىك ينستيتۋتتاردى دامىتۋ سالاسىنداعى قىزمەتكە جوعارى باعا بەرىلگەن بۇۇ-نىڭ قازاقستانداعى ەلدىك توبىنىڭ 2022 جىلعا ارنالعان قىزمەتى تۋرالى ەسەبى دالەل بولا الادى. بۇل ءبىزدىڭ ءوزارا جەمىستى ءىس-قيمىلىمىزدىڭ تىكەلەي ناتيجەسى ەكەنىن اتاپ وتكىم كەلەدى»، — دەدى پرەمەر-مينيستر.
سونىمەن قاتار ۇكىمەت الەۋمەتتىك سالانى دامىتۋ بويىنشا ماقساتتى جۇمىستى جالعاستىرىپ كەلەدى. ماسەلەن، 1 قاڭتاردان باستاپ ازاماتتاردى مەملەكەتتىك قولداۋ شارالارىمەن قامتاماسىز ەتۋ قاجەتتىلىگىن انىقتاۋعا كومەكتەسەتىن وتباسىنىڭ سيفرلىق كارتاسى ەنگىزىلدى. ە-دەنساۋلىق ءبىرىڭعاي پلاتفورماسى اياسىندا دەنساۋلىق ساقتاۋ جۇيەسىن تولىق سيفرلاندىرۋ جۇرگىزىلۋدە. اۋىلدىق دەنساۋلىق ساقتاۋدى كەشەندى جاڭعىرتۋ باستالدى، بۇل 4 ملن اۋىل تۇرعىنىنا مەديسينالىق كومەك كورسەتۋدىڭ ساپاسىن جاقسارتۋعا مۇمكىندىك بەرەدى. اتاپ ايتقاندا، 600-دەن استام دارىگەرلىك امبۋلاتوريا، فەلدشەرلىك-اكۋشەرلىك جانە مەديسينالىق پۋنكتتەر سالىنادى، وسى جىلدان باستاپ 32 اۋدانارالىق اۋرۋحانانى جاڭعىرتۋ باستالادى.
«ءبىز جاستاردىڭ جاعدايىنا دا ەرەكشە كوڭىل بولەمىز. جاستار ساياساتىنىڭ 2029 جىلعا دەيىنگى تۇجىرىمداماسى قابىلداندى، وندا تابىس دەڭگەيىن ارتتىرۋ، تۇرعىن ۇيمەن قامتاماسىز ەتۋ جانە ساپالى ءبىلىم بەرۋ شارالارى قاراستىرىلعان»، — دەپ اتاپ ءوتتى ءاليحان سمايىلوۆ.
ءوز كەزەگىندە ناتاليا كانەم قازاقستاننىڭ سوڭعى جىلدارى الەۋمەتتىك سالانى دامىتۋدا قول جەتكىزگەن جوعارى ناتيجەلەرىن اتاپ ءوتىپ، UNFPA جاڭا باستامالاردى جۇزەگە اسىرۋدا رەسپۋبليكاعا كومەك پەن تەحنيكالىق قولداۋ كورسەتۋدى جالعاستىرۋعا دايىن ەكەنىن راستادى.
«ءبىز ۇكىمەتتىڭ جاستاردى، اسىرەسە، رەسپۋبليكا بويىنشا اشىلعان جاستار دەنساۋلىق ورتالىقتارىن دامىتۋ ءۇشىن قولايلى جاعداي جاساۋ جونىندەگى كۇش-جىگەرىن قۇپتايمىز. بۇل - تاماشا جەتىستىك، وزىق تاجىريبەنىڭ ۇلگىسى، ءبىز بۇل تۋرالى الماتىدا ءسوزسىز ايتاتىن بولامىز، وندا الەمنىڭ تۇكپىر-تۇكپىرىنەن UNFPA-نىڭ 200-دەن استام كوشباسشىسى جينالادى. وسى تۇرعىدا ومىرلىك داعدىلارعا نەگىزدەلگەن ءبىلىم بەرۋ تۇجىرىمداماسىنىڭ ماڭىزدىلىعىن دا اتاپ وتكىم كەلەدى، UNFPA بۇل باعىتتى قولداۋعا دايىن»، — دەدى ناتاليا كانەم.