«ALMATY AQSHAMY» – 35 «اقشام» ارداگەرلەرى
«الماتى اقشامى» ماعان نەگە ىستىق؟ 1990 جىلداردىڭ باسىندا تاۋەلسىزدىكتىڭ جىلى لەبى ەسە باستاعان ۋاقىتتا گازەتكە وندىرىستىك تاجىريبەدەن وتۋگە كەلدىم. ۋنيۆەرسيتەتتى بىتىرەتىن كەزىم، بەسىنشى كۋرستا وقيمىن. جاستىق ماكسيماليزم بار. قايتپاي، شارشاماي جۇمىس ىستەيتىن ۋاقىت. قاي جەرگە جۇمساسا دا، شامام كەلگەنشە تىندىرىمدى اتقارىپ كەلۋگە تىرىسامىن. ءسويتىپ ءجۇرىپ ءبىر اي وندىرىستىك تاجىريبە ۋاقىتى دا وتە شىقتى.
ءالى كۇنگە دەيىن تاقىرىپتارى ەسىمدە. «دوروجنيك» نەگە دابىل قاعادى؟» «الماگۇل» تۇرعىندارى نەگە الاڭدايدى؟» جانە وسى تاقىلەتتەس تاعى باسقا ونداعان ماقالالارىم جارىققا شىقتى. جاس تۇلەكتەردى ىزدەپ جاتقان ۋاقىت. گازەتتىڭ باس رەداكتورى يسلام بەيسەبايەۆ جارتى ستاۆكادا جۇمىس ىستەۋگە ۇسىنىس جاسادى. قارا شاڭىراق كازگۋ-دى ەندى بىتىرەيىن دەپ وتىرعان ستۋدەنتكە بۇل ۇلكەن كومەك، قۋانىش بولدى. ءسويتىپ، «الماتى اقشامى» گازەتىنە بەسىنشى كۋرستا جۇمىسقا ورنالاستىم.
جوعارى وقۋ ورنىن بىتىرگەنىمىز تۋرالى قولعا ديپلوم العاننان كەيىن 1991 جىلدىڭ تامىز ايىندا «جاس الاش» گازەتى تىلشىلىككە شاقىردى. ءبىراق «الماتى اقشامى» گازەتى مەن ءۇشىن ۇلكەن العاشقى مەكتەپ بولدى. رەداكسيادا يسلام بەيسەبايەۆ، باقىتجان جيەنعالييەۆ، سارقىت ىسقاقوۆا، قايرات الىمبەكوۆ، ءجۇسىپ ەرعالييەۆ (جاتقان جەرلەرى جايلى بولسىن) جانە بولات جەتەكباي، قانات قايىم، ءجۇنىس ومار، سەيسەنحان ماحانبەت، كادىربەك قۇنىپيا ۇلى، سەرىك قاراجان، راۋشان يماشيەۆا سىندى سايىپقىران جۋرناليستەرمەن بىرگە تىلشىلىك جۇمىستىڭ قىر-سىرىنا قانىقتىم.
اقيقاتى، «الماتى اقشامى» گازەتىنىڭ جۋرناليستەرى ەلىمىزدىڭ تاۋەلسىزدىك الۋىنا ايرىقشا ۇلەس قوستى. الماتىداعى كوشە اتتارىن وزگەرتۋدە ەرەكشە ەڭبەك ءسىڭىردى دەپ ويلايمىن. ءتىپتى، كوشە اتتارىن وزگەرتۋگە قاتىستى بەلگىلى تۇلعالار مەن وقىرمانداردان رەداكسياعا ەسەپسىز حاتتار اكەلەتىن. مۇنىڭ ءبارى گازەت بەتىندە جاريالانىپ، ۇسىنىستار قالالىق اكىمشىلىككە جولدانىپ وتىردى.
ەكىنشىدەن، سول ۋاقىتتا گازەت بەتىندە تاريحي ماسەلەلەر وتە كوپ جازىلدى. ەسىمدە، ن.ءمىڭجانيدىڭ «قازاقتىڭ قىسقاشا تاريحى» جانە «قازاقتىڭ ميف اڭىزدارى» اتتى ەڭبەكتەرى ءنومىر سايىن جۇڭگو تىلىنەن اۋدارىلىپ بەرىلىپ وتىردى. قازاققا بۇرىن ءمالىم بولماعان باسقا دا تاريحي تۋىندىلار ءجيى جاريالاندى. ۇلت تاريحىنا دەگەن ىنتىزارلىق مەنى وزىنە تارتقان بولار، «الماتى اقشامى» گازەتىندە تاريحي ماسەلەلەردىڭ جازىلۋى» دەگەن تاقىرىپتا ديپلومدىق جۇمىسىمدى قورعادىم.
مىنە، سودان بەرى 35 جىلعا جۋىق ۋاقىت ءوتىپتى. ءبىراق ءبارى دە كەشەگىدەي كوز الدىمدا. ءقازىر «الماتى اقشامى» رەسپۋبليكالىق دەڭگەيدەگى ىرگەلى باسىلىم ەكەنىن ەكىنىڭ ءبىرى مويىندايدى. باعالايدى. باسىلىم جاڭاردى، ىرگەسى كەڭەيدى، زاماناۋي گازەتكە اينالدى. سوندىقتان جۋرناليستيكادا مەن ءۇشىن العاشقى مەكتەپ بولعان «الماتى اقشامى» گازەتى عۇمىرلى بولسىن دەيمىن.