قازاقستاندا العاشقى كريميناليستيكالىق سيفرلىق زەرتحانا ىسكە قوسىلدى.
ول ءىىم ورتالىق اپپاراتىنىڭ بازاسىندا ورنالاسقان، دەپ حابارلايدى Almaty-akshamy.kz.
ءىىم اقپاراتىنا سايكەس، اتالمىش زەرتحانانىڭ ماماندارى ەكى باعىتتا جۇمىس ىستەيدى.
ءبىرىنشىسى – قىزمەتكەرلەر باعدارلامالىق-اپپاراتتىق كەشەندەردى پايدالانا وتىرىپ، كومپيۋتەرلىك-تەحنيكالىق زەرتتەۋلەر جۇرگىزەدى.
ەكىنشىسى – بيومەتريالىق بەلگىلەر بويىنشا جەكە باستى سايكەستەندىرۋدى (بەينەلەر اناليتيكاسى) پايدالانا وتىرىپ، فوتو/ۆيدەو بويىنشا پورترەتتىك زەرتتەۋلەر جۇرگىزۋ. بۇل قىلمىسكەرلەر مەن قۇقىق بۇزۋشىلاردى اۆتوماتتى تۇردە انىقتاۋعا كومەكتەسەدى. سونىمەن قاتار كريميناليستيكالىق سيفرلىق زەرتحانا الاياقتار قۇرباندارىنىڭ سانىن ازايتۋعا، كىناسىز ادامدى ۇستاۋ ءقاۋپىن بولدىرماۋعا، قۇقىق بۇزۋشىلاردى انىقتاۋعا جانە تەرگەۋ كەزىندە دالەلدەمەلىك بازانى بەكىتۋگە مۇمكىندىك بەرەدى.
– مۇندا جاڭا قۇرىلعىلار بار، قىسقا مەرزىمدە كومپيۋتەرلىك تەحنيكالىق زەرتتەۋلەر جۇرگىزۋگە مۇمكىندىك بەرەتىن جاڭا باعدارلامالىق جاساقتاما ورناتىلعان. بۇگىنگى تاڭدا بۇل ءىىم جۇيەسىندەگى زەرتتەۋدىڭ جاڭا ءتۇرى. جوبا قوعامدىق قاۋىپسىزدىكتى قوعاممەن سەرىكتەستىكتە قامتاماسىز ەتۋ تۇجىرىمداماسى اياسىندا ىسكە قوسىلدى. جەكە باستى سايكەستەندىرۋ جۇيەسى بويىنشا جاقسى ناتيجەلەر بار. ءقازىردىڭ وزىندە ءبىز بارلىق جاسىرىن ۇرلىقتاردى كەڭسەدە وتىرىپ-اق اشامىز. كريميناليست ادامداردى قاشىقتان انىقتاي الادى، – دەدى ق ر ءىىم جەدەل-كريميناليستيكالىق دەپارتامەنتىنىڭ باسقارما باستىعىنىڭ ورىنباسارى مۇحيت سۇلەيمەنوۆ.
بۇل شارا جاسالعان قۇقىق بۇزۋشىلىق ءۇشىن جازانىڭ بۇلتارتپاستىعى قاعيداتىن قامتاماسىز ەتەدى، قۇقىققا قايشى ارەكەتتەردىڭ الدىن الۋدىڭ ەڭ جاقسى ءتاسىلى بولىپ تابىلادى، ەلدەگى ازاماتتاردىڭ قاۋىپسىزدىگىن ارتتىرادى. جالپى كريميناليستەردىڭ جۇمىسى سان قىرلى. سوندىقتان قىزمەتكەرلەر ءۇشىن ءوز قابىلەتتەرىن دامىتۋ جانە ماتەريالدىق-تەحنيكالىق جابدىقتاردى جاقسارتۋ ماڭىزدى.
– بۇگىن ءبىز ىشكى ىستەر مينيسترىنە الەمدىك كريميناليستيكانىڭ جاڭا ازىرلەمەلەرىن تانىستىردىق. بۇگىنگى تەحنيكا قىلمىستىڭ كورىنبەيتىن، جاسىرىن ىزدەرىن انىقتاۋعا مۇمكىندىك بەرەدى. قازىرگى ۋاقىتتا بىزدە ەلىمىزدىڭ جەدەل-كريميناليستيكالىق قىزمەتتەرىنىڭ بارلىق باسشىلارى ءۇشىن ترەنينگ وتكىزىلۋدە. ولاردى جاڭا تەحنيكامەن جۇمىس ىستەۋگە ۇيرەتىپ جاتىرمىز، – دەپ اتاپ ءوتتى ق ر ءىىم جەدەل-كريميناليستيكالىق دەپارتامەنت باستىعىنىڭ ورىنباسارى سەرگەي ستيحەيەۆ.
ايتا كەتۋ كەرەك، ىىم-دە بارلىق قاجەتتى جابدىقتارمەن جابدىقتالعان مولەكۋلالىق-گەنەتيكالىق زەرتحانا جۇمىس ىستەيدى. وندا جوعارى بىلىكتى ماماندار جۇمىس ىستەيدى.