«الفا-بانك قازاقستان» وتاندىق قارجى ۇيىمىنا اينالادى

جاقىندا تاعى ءبىر رەسەيلىك بانكتىڭ ەنشىلەس ۇيىمى وتاندىق بانكتىڭ بىرىمەن كەلىسىمگە كەلدى.

سەنتركرەديت بانكى «الفا-بانك قازاقستاندى» ساتىپ الدى. ەندى الفا-بانك اكسيونەرلەر قۇرامىنان شىعىپ، ءوز وكىلدەرىن ديرەكتورلار كەڭەسىنەن كەرى قايتارادى. بانكتىڭ باسپا ءسوز حابارلاماسىندا وسىلاي دەلىنگەن، دەپ حابارلايدى Almaty-akshamy.kz 24.kz-كە سىلتەمە جاساپ. 

قوس تاراپ اراسىنداعى مامىلە زاڭدى تۇردە اياقتالعاندا، «الفا-بانك قازاقستانعا» رەبرەندينگ جۇرگىزىلەدى. وسىلايشا ول تولىقتاي قازاقستاندىق بانككە اينالادى. سونداي-اق اكسيونەر كليەنتتەر الدىنداعى بارلىق مىندەتتەمەلەردى ورىنداۋ ءۇشىن بانكتى قوسىمشا وتىمدىلىكپەن قولداۋعا دايىن ەكەنىن حابارلادى.

ەسكە سالايىق، قازاقستاندىق الفا-بانككە قاتىستى سانكسيالار 6 مامىردا كۇشىنە ەنەتىنى ايتىلعان. سانكسيا استىندا قالماۋ ءۇشىن قارجى ۇيىمى جاڭا اكسيونەر ىزدەگەن. «ريسك تەيكەر» ساراپشىلارى بۇل مامىلە سەنتركرەديت بانككە بولاشاقتا كاپيتالىن ۇلعايتۋعا مۇمكىندىك بەرەدى دەپ سانايدى. بۇعان دەيىن ساراپشىلار سانكسياعا ىلىنگەن بانكتەردى ۇلكەن جەڭىلدىكپەن ساتىپ الادى دەپ بولجاعان.