بۇل جۇمىستاردىڭ ەڭ ءىرىسى الەۋمەتتىك قىزمەتتەر پورتالى بولىپ تۇر. پورتال مۇگەدەكتىگى بار ادامدارعا قىزمەتتەر مەن وڭالتۋ قۇرالدارىن تىكەلەي ءونىم بەرۋشىدەن ساتىپ الۋعا مۇمكىندىك بەرەدى.
ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ حالىققا ەسەپ بەرۋ كەزدەسۋى بارىسىندا مەملەكەتتىك قىزمەتتەردى سيفرلاندىرۋ جانە الەۋمەتتىك-ەڭبەك سالاسىنا ەنگىزىلەتىن وزگە دە سيفرلىق شەشىمدەر تۋرالى ايتىپ بەردى، دەپ حابارلايدى Almaty-akshamy.kz ق ر ەڭبەك جانە الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
2021 جىلدىڭ باسىندا مەملەكەتتىك قىزمەتتەردىڭ 91%-ى (45 قىزمەتتىڭ 41ء-ى) سيفرلاندىرىلدى، ولاردىڭ جارتىسىنان استامى – پرواكتيۆتى. اعىمداعى جىلى كورسەتىلەتىن قىزمەتتەر سانىن 93%-عا دەيىن ارتتىرۋ جوسپارلانۋدا.
«ءبىز سيفرلىق شەشىمدەردى بەلسەندى ەنگىزىپ، پرواكتيۆتى مەملەكەتتىك قىزمەتتەردىڭ بيزنەس-پروسەستەرىن وڭتايلاندىرامىز، كورسەتىلەتىن قىزمەتتەردىڭ سانىن ارتتىرۋ جانە ولاردى ازاماتتار ءۇشىن قولجەتىمدى ەتۋ ءۇشىن كەزەڭدەر سانىن قىسقارتامىز. وتكەن جىلى 12،4 ملن قىزمەت كورسەتىلدى، ونىڭ جارتىسىنان كوبى، ياعني 7،8 ملن.-ى – ەلەكتروندىق قىزمەت»، – دەپ اتاپ ءوتتى سەرىك شاپكەنوۆ.
ىسكە اسىرىلىپ جاتقان سيفرلىق جوبالاردىڭ ءبىرى – مۇگەدەكتىگى بار ادامدارعا قىزمەتتەر مەن وڭالتۋ قۇرالدارىن تىكەلەي ءونىم بەرۋشىدەن ساتىپ الۋعا مۇمكىندىك بەرەتىن الەۋمەتتىك قىزمەتتەر پورتالى، بۇل ەڭ الدىمەن قىزمەتتەر ساپاسىنىڭ وسۋىنە ىقپال ەتەدى، سونداي-اق سىبايلاس جەمقورلىق تاۋەكەلدەرىن تومەندەتەدى.
2020 جىلى مۇگەدەكتىگى بار ادامدار پورتال ارقىلى 128 مىڭ قىزمەتكە تاپسىرىس بەرگەن جانە ولاردى العان، ونىڭ ىشىندە وڭالتۋ قۇرالدارى، جەكە كومەكشىنىڭ قىزمەتتەرى، ىمداۋ ءتىلى مامانىنىڭ قىزمەتتەرى، ساناتوريي-كۋرورتتىق ەمدەۋ بار.
«سونداي-اق، ءبىز وتباسىنىڭ سيفرلىق كارتاسىن – ومىرلىك قيىن جاعدايدا جۇرگەن وتباسىلاردى اۆتوماتتى رەجيمدە انىقتاۋعا، ولارعا قاجەتتى كەشەندى قولداۋ شارالارىن پرواكتيۆتى تۇردە كورسەتۋگە، سونداي-اق قولجەتىمدى ينديكاتورلار ارقىلى وتباسىنىڭ الەۋمەتتىك جاعدايىنىڭ ناشارلاۋىن بولجاۋعا مۇمكىندىك بەرەتىن جوبانى جاساۋ بويىنشا جۇمىستى باستادىق»، – دەدى ەڭبەك مينيسترلىگىنىڭ باسشىسى.
بۇدان باسقا، سيفرلىق جۇمىسپەن قامتۋ ورتالىقتارىن كەزەڭ-كەزەڭىمەن ەنگىزۋ ءجۇرىپ جاتىر.
ءبىرىنشى كەزەڭدە 2020 جىلى ءىرى قالالارداعى 17 پيلوتتىق جۇمىسپەن قامتۋ ورتالىقتارىنىڭ بازاسىندا ەلەكتروندىق ەڭبەك بيرجاسى ارقىلى ءتورت قىزمەتتى ۇسىنۋ بويىنشا جوبا ىسكە قوسىلدى، ول ءتورت باعىت: جۇمىس ىزدەپ جۇرگەن ادامدى تىركەۋ، جۇمىسسىزدى تىركەۋ، جۇمىسىنان ايىرىلعان جاعدايدا الەۋمەتتىك تولەم تاعايىنداۋ، سونداي-اق جۇمىسپەن قامتۋعا جاردەمدەسۋدىڭ بەلسەندى شارالارىن، ونىڭ ىشىندە جاستار پراكتيكاسىن، قوعامدىق جۇمىستاردى جانە الەۋمەتتىك جۇمىس ورىندارىن تاڭداۋ.
«2021 جىلدىڭ باسىنان باستاپ پيلوت اياسىندا 6،8 مىڭ ادام جۇمىسقا ورنالاستىرىلدى. ەكىنشى كەزەڭدى ءبىز ەلەكتروندىق ەڭبەك بيرجاسى ارقىلى بارلىق قازاقستاندىقتار ءۇشىن حالىقتى جۇمىسپەن قامتۋ ورتالىقتارىنىڭ وسى ونلاين-قىزمەتتەرىن قولجەتىمدى ەتە وتىرىپ، 1 مامىردان باستاپ ىسكە اسىرا باستادىق. ءبىز بيىلعى جىلى جۇمىسپەن قامتۋ قىزمەتتەرىنە وتىنىشتەردىڭ كەمىندە جارتىسى ونلاين رەجيمدە بولادى دەپ بولجاپ وتىرمىز»، – دەپ اتاپ ءوتتى سەرىك شاپكەنوۆ.
ۆەدومستۆو باسشىسىنىڭ ايتۋىنشا، e-HR جوباسى – ەڭبەك شارتتارىن ەسەپكە الۋدىڭ ءبىرىڭعاي جۇيەسى بەلسەندى تۇردە دامۋدا. بۇگىنگى تاڭدا جۇيەدە 4،8 ملن شارت تىركەلگەن، وعان 171 مىڭ ۇيىم قوسىلعان، بۇل بارلىق جۇمىس ىستەيتىن ازاماتتاردىڭ شامامەن 79%-ىن قۇرايدى.
«بيىل ءبىز ەڭبەك شارتتارىنىڭ كەمىندە 85%-ىن e-HR جۇيەسىمەن قامتۋدى جوسپارلاپ وتىرمىز، ال 2022 جىلى بارلىق جۇمىس ىستەيتىن حالىقتى تولىق قامتيمىز دەپ كۇتەمىز. وسىلايشا، جۇمىسقا ورنالاستىرۋدى جەڭىلدەتۋدەن باسقا، اشىقتىق ەسەبىنەن ازاماتتاردىڭ ەڭبەك قۇقىقتارىن ساقتاۋدىڭ وزەكتى مونيتورينگى قامتاماسىز ەتىلەدى»، – دەپ تۇيىندەدى سەرىك شاپكەنوۆ.