2025 جىلدىڭ سوڭىنا دەيىن الماتىداعى الەۋمەتتىك نىسانداردىڭ 30%-ى مۇمكىندىگى شەكتەۋلى ازاماتتارعا بەيىمدەلەدى
بۇل تۋرالى وكق بريفينگىندە الماتى اكىمى ەربولات دوسايەۆ مالىمدەدى. قازىرگى ۋاقىتتا قالادا العاش رەت قالالىق ينفراقۇرىلىم وبەكتىلەرىنە پاسپورتتاۋ جۇرگىزىلۋدە. 2023 جىلى 7،5 مىڭ نىسان قامتىلدى. الەۋمەتتىك ينفراقۇرىلىمدى بەيىمدەۋدى، اتاپ ايتقاندا، ەمحانالار، اۋرۋحانا، حقكو-لاردا پاندۋستار، قوسالقى تۇتقالار، تاكتيلدى پليتالار ورناتۋدى 2025 جىلدىڭ سوڭىنا دەيىن جۇرگىزۋ جوسپارلانۋدا.
"2030 جىلعا دەيىن تەاترلار، مۇراجاي، كىتاپحانا مەن باسقا دا مادەنيەت نىساندارىندا پاسپورتتاۋ جۇرگىزىلەدى. وسىلايشا 2030 جىلعا قاراي قالالىق نىسانداردىڭ 75%-ى بەيىمدەلەدى. جەكە ۇيىمدار دا بارلىق قالا تۇرعىندارىن تەڭ جاعدايدا سەزىنىپ، كەز كەلگەن يگىلىككە قول جەتكىزە الاتىنداي بولادى دەپ ۇمىتتەنەمىن"، – دەپ اتاپ ءوتتى ەربولات دوسايەۆ.
ايتا كەتەيىك، الماتىدا ينۆاتاكسي جۇمىسىن جالعاستىرۋدا. ونىڭ قىزمەتىن 2 مىڭعا جۋىق ادام پايدالانادى. 2023 جىلى مامانداندىرىلعان اۆتوكولىكتەردىڭ سانى 64-تەن 100 بىرلىككە دەيىن ۇلعايتىلدى. بۇدان وزگە مۇمكىندىگى شەكتەۋلى جانداردى الەۋمەتتىك قولداۋ بويىنشا قارجىلاندىرۋ كولەمى جىل سايىن ارتىپ كەلەدى. وتكەن جىلمەن سالىستىرعاندا بيۋدجەت 40%-عا ءوستى.