ۇكىمەت باسشىسى ءۇش ءوڭىردىڭ اكىمدىگى مەن مينيسترلىكتى سىنعا الدى
ق ر پرەمەر-مينيسترى ءاليحان سمايىلوۆ ۇكىمەتتىڭ سيفرلىق كەڭسەسىندە ق ر پرەزيدەنتى قاسىم-جومارت كەمەل ۇلى توقايەۆتىڭ وسى جىلدىڭ باسىنان بەرى بەرگەن تاپسىرمالارىن ىسكە اسىرۋ جونىندە كەڭەس وتكىزدى، دەپ حابارلايدى Almaty-akshamy.kz ق ر پرەمەر-مينيسترىنىڭ باسپا ءسوز قىزمەتىنە سىلتەمە جاساپ.
الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە جاستاردى جۇمىسپەن قامتۋ ماسەلەلەرى قارالدى.
الەۋمەتتىك ماڭىزى بار ازىق-تۇلىك ونىمدەرى باعاسىنىڭ ەڭ كوپ ءوسىمى ەلوردادا – 1،5%-عا، اقمولا وبلىسىندا – 1،4%-عا، اقتوبە وبلىسىندا – 1،1%-عا جانە جامبىل وبلىسىندا – 1%-عا تىركەلدى. ۇكىمەت باسشىسى اتالعان وڭىرلەر اكىمدىكتەرىنىڭ، سونداي-اق اۋىل شارۋاشىلىعى مينيسترلىگىنىڭ حالىقتى قولجەتىمدى باعادا الەۋمەتتىك ماڭىزى بار ازىق-تۇلىك تاۋارلارىمەن قامتاماسىز ەتۋ جونىندەگى جۇمىسىن سىنعا الدى.
«اكىمدەر مەن اۋىل شارۋاشىلىعى مينيسترلىگى تۇراقتاندىرۋ قورلارىنىڭ مينيمالدى كولەمىن قالىپتاستىرعان جوق، “اينالىم سحەماسى” بويىنشا جەتكىلىكتى قاراجات بولىنبەگەن، ساۋدا ۇستەمەلەرىنە باقىلاۋ ناشار جۇرگىزىلگەن. ءىس جۇزىندە، الەۋمەتتىك ماڭىزى بار ازىق-تۇلىك تاۋارلارى باعاسىنىڭ ءوسۋىن تەجەۋ جۇمىسى ءبىرىزدى اتقارىلىپ جاتقان جوق. سىزدەردىڭ مىندەتتەرىڭىز – حالىققا ءبىرىنشى كەزەكتە قاجەتتى تاۋارلاردى قولجەتىمدى باعادا قامتاماسىز ەتۋ»، — دەپ اتاپ ءوتتى ءا. سمايىلوۆ.
پرەمەر-مينيستر ورتالىق مەملەكەتتىك ورگاندار مەن اكىمدىكتەرگە ازىق-تۇلىكتىڭ ءاربىر اتاۋى بويىنشا باعانى باقىلاۋدى كۇشەيتۋدى، تۇراقتاندىرۋ قورلارىندا قاجەتتى كولەمدى قامتاماسىز ەتۋدى جانە «اينالىم سحەماسىنا» قوسىمشا قارجى ءبولۋدى تاپسىردى.
«باعا بەلگىلەۋ تىزبەگىن تەرگەۋ جونىندەگى وڭىرلىك كوميسسيالاردىڭ جۇمىسىن كۇشەيتىپ، بولشەك ساۋدا نىساندارىنىڭ ساۋدا ۇستەمەسىنىڭ رۇقسات ەتىلگەن مولشەرىن ساقتاۋىن قاداعالاڭىزدار»، - دەدى ءا. سمايىلوۆ.
ۇكىمەت باسشىسى جاستاردىڭ جۇمىسسىزدىق دەڭگەيىن تومەندەتۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگىنە ۇلتتىق ەكونوميكا جانە قارجى مينيسترلىكتەرىمەن بىرلەسىپ، «جاستار پراكتيكاسى» جانە «العاشقى جۇمىس ورنى» جوبالارىنا قاتىسۋ ۇزاقتىعى مەن ەڭبەكاقى مولشەرىن ۇلعايتۋ مۇمكىندىگىن قاراستىرۋدى تاپسىردى.
اتالعان جوبالار بويىنشا ەڭبەكاقى مولشەرىن 20-25 اەك-تەن 30 اەك-كە دەيىن ارتتىرۋ كوزدەلگەن. «جاستار پراكتيكاسىنىڭ» مەرزىمى 6 ايدان 12 ايعا دەيىن، «العاشقى جۇمىس ورنى» جوباسى 12 ايدان 18 ايعا دەيىن ۇزارتىلادى.
جاستاردى وقىتۋ، كاسىپتىك باعدارلاۋ جانە جۇمىسقا ورنالاستىرۋ ماسەلەلەرىنە كوبىرەك كوڭىل ءبولۋ قاجەت. ءتيىستى تارماقتار ۇكىمەتتىڭ 2022 جىلعا ارنالعان ءىس-قيمىل باعدارلاماسىنا ەنگىزىلەدى، — دەپ اتاپ ءوتتى ءا. سمايىلوۆ.