ءقازىر الەۋمەتتىك جەلىدە «وتباسىلىق جان-جالدان ارىلتامىن، «ءومىرىڭدى وزگەرتەمىن»، «تابىسىڭدى كوبەيتەمىن» دەگەنت جارناما جەتىپ ارتىلادى.
ءبىراق، كاسىبي پسيحولوگتار ولاردىڭ بارلىعى بىلىكتى مامان ەمەستىگىن ايتۋدا، دەپ حابارلايدى Almaty-akshamy.kz.
شىمكەنتتىك مەنتور پەريزات قاقارباي قىزىنىڭ پسيحولوگيا باعىتىندا جوعارعى ءبىلىمى جوق. دەگەنمەن، ونىڭ قىزمەتىنە سۇرانىس كوپ ەكەنىن جاسىرمايدى.
«ءبىرىنشى باستاعانىما 6 جىل بولدى. ءوزىمنىڭ باسىمداعى پروبلەمالارىممەن كەلدىم. وتباسىداعى جاعداي بويىنشا. سونىڭ شەشىمىن ىزدەپ ءار جەرگە بارىپ، مەن ءقازىر مەنتورلىقپەن اينالىسىپ جاتىرمىن عوي. ءبىز پرياموي ميعا كىرەمىز دە، تابىستىڭ كوبەيمەۋىنە نە سەبەپ ەكەنىن تابامىز دا، ترانسفورماسيا جاسايمىز»، - دەيدى مەنتور پەريزات قاقارباي قىزى.
الايدا كاسىبي پسيحولوگتار ديپلومى جوق مۇنداي ماماندار جۇمىسىنا قارسى. شولپان ءابىلوۆانىڭ پىكىرىنشە، دەرەكسىز سالىنعان وي ءقاۋىپتى.
«مەنتور رەتىندە 50 ادامعا ونلاين ساباق بەرۋى مۇمكىن، ءبىراق ادام ءارتۇرلى بولعان سوڭ تولىققاندى جەتپەيدى، جەتكەننىڭ وزىندە دۇرىس ارناعا تۇسپەۋى مۇمكىن. ساناعا سالعان وي جاعىنان ءقاۋىپتى. مىسالى ادام ءوزى قينالىپ تۇرعان كەزدە، جانى اۋىرىپ تۇرعان كەزدە ناقتى ءبىر دەرەكسىز وي سالىناتىن بولسا ول ءقاۋىپتى بولادى»، - دەيدى پسيحولوگ شولپان ءابىلوۆا.
بۇل جاعىمسىز تەندەنسيا باتىس ەلدەرىندە دە بەلەڭ الىپ بارادى. ماسەلەن، «PlusCare» ۆيرتۋالدى دەنساۋلىق ساقتاۋ پلاتفورماسى Tic Tok-تا جاريالانعان 500 بەينەروليككە ساراپتاما جاساپ، ونىڭ 84 پايىزى ادامدى شاتاستىراتىنىن، ءتىپتى ءقاۋىپتى ەكەنىن انىقتادى. قوعام بەلسەندىسى مۇرات باتاي جالپى پسيحولوگقا جۇگىنۋدى قۇپ كورمەيدى. ونىڭ ويىنشا ءقازىر بۇل سالانى تەك تابىس كوزى ءۇشىن پايدالاناتىندار كوپ.
«كەز كەلگەن ادامنىڭ باسىنا تۇسكەن قيىنشىلىقتاردى جويۋ ءۇشىن ادام ءبىرىنشى ءوز وتباسىمەن سودان كەيىن جاقىندارىمەن كەڭەسىپ بارىپ شەشۋ كەرەك. ءوزىنىڭ باسىنا تۇسكەن قيىنشىلىقتى الەۋمەتتىك جەلىدەگى پسيەۆدوپسيحولوگتاردىڭ كەڭەسىمەن ەمەس. بۇرىنعى ادىسشە شەشكەن دۇرىس. تۋىستان ارتىق جاقىن جوق. ال سول پسيحولوگتار سەانس وتكىزىپ، اقشاسىن العاننان كەيىن قاتىسى جوق بولادى»، - دەيدى قوعام بەلسەندىسى مۇرات باتاي.