الەۋمەتتىك جەلىدە ءانشى تورەعالي تورەالىنىڭ ماس كۇيىندە ۇستالعان ۆيدەوسى تارادى

وندا ءانشى جىگىتتىڭ پوليسەيلەرگە قارسىلىق ءبىلدىرىپ، كولىكتەن تۇسپەي جاتقانىن كورۋگە بولادى.

وقيعاعا قاتىستى پوليسيا تۇسىنىك بەردى، دەپ حابارلايدى Almaty-akshamy.kz.

Inbusiness.kz سايتىنىڭ اقپاراتىنا جۇگىنسەك، الماتى قالالىق پد 14  ماۋسىم مايلين كوشەسىنىڭ بويىندا، سولتۇستىك باعىتتا، جەرگىلىكتى پوليسيا قىزمەتىنىڭ مامانداندىرىلعان باتالونىنىڭ ەكيپاجى 1992 جىلى تۋعان ا. ەسىمدى ازاماتتىڭ باسقارۋىنداعى Lexus اۆتوكولىگىن توقتاتقان.

"جۇرگىزۋشىنىڭ مىنەز-قۇلقى ورەسكەل بولىپ كورىندى: ول اگرەسسيۆتى بولدى، پوليسيانىڭ زاڭدى تالاپتارىنا باعىنبادى، تۇراقتا تۇرعان Chevrolet كولىگىنە زاقىم كەلتىرىپ، ۇستالعان ورنىنان قاشىپ كەتپەك بولدى.

قۇقىق بۇزۋشىنىڭ جولى بۇعاتتالدى. پاترۋلدىك پوليسيا قىزمەتكەرلەرى ونى ۇستاپ، مەديسينالىق تەكسەرۋگە الىپ باردى. ساراپتاما ناتيجەسىندە ا. ەسىمدى ازاماتتىڭ ەسىرتكىگە ماس ەكەندىگى بەلگىلى بولدى"، دەپ حابارلادى الماتى قالاسى پوليسيا دەپارتامەنتىنىڭ باسپا ءسوز قىزمەتى.

ءقازىر ق ر اقبك-نىڭ 608-بابى 3-بولىگى، 613-بابى 1-بولىگى، 599-بابى 1-بولىگى، 596-بابى  3-بولىگى، 600-بابى 1-بولىگى جانە 230-بابى 2-بولىگى بويىنشا حاتتامالار تولتىرىلدى.

كولىك مامانداندىرىلعان ايىپپۇل تۇراعىنا قويىلدى. ءوندىرىس ماتەريالدارى شەشىم شىعارۋ ءۇشىن سوتقا جىبەرىلەتىن بولادى.