2025 جىلدىڭ ەكى ايىندا الەۋمەتتىك ينسپەكتورلار حالىقتىڭ الەۋمەتتىك وسال ساناتتارىنىڭ قۇقىقتارىن قورعاۋ ماقساتىندا 87 تەكسەرۋ جۇرگىزدى.
ونىڭ 62ء-سى جوسپاردان تىس، 5-ەۋى پروفيلاكتيكالىق باقىلاۋ شەڭبەرىندە، 20-سى پروكۋراتۋرانىڭ تالابى بويىنشا بولدى. تەكسەرۋ قورىتىندىسى بويىنشا انىقتالعان بۇزۋشىلىقتاردى جويۋ تۋرالى 34 ۇيعارىم بەرىلدى، شامامەن 11،4 ملن تەڭگەگە 44 ايىپپۇل سالىندى، دەپ حابارلايدى aqshamnews.kz.
مەملەكەتتىك باقىلاۋمەن: اكىمدىك – 1، جەرگىلىكتى اتقارۋشى ورگانداردىڭ بولىمدەرى مەن باسقارمالارى – 15، مەملەكەتتىك مەكەمە – 1، اۋرۋحانالار، ەمحانالار – 5، بالاباقشالار – 4، مەكتەپتەر – 9، كوللەدجدەر، ليسەيلەر – 5، دك – 10، دۇكەندەر – 12، كافەلەر، مەيرامحانالار، قوناق ۇيلەر – 8، ساۋدا ۇيلەرى – 3، پوليسيا پۋنكتى – 1، ستومالوگيا – 3، اۆتوبۋس پاركتەرى، اۆتو/تەمىرجول ۆوكزالدارى، اۋەجايلار – 6، كىتاپحانا – 1 جانە باسقالار قامتىلدى.
ماسەلەن، قوستاناي وبلىسىندا مۇگەدەكتىگى بار ادامداردىڭ قوعامدىق بىرلەستىگىنىڭ ءوتىنىشى نەگىزىندە مۇگەدەكتىگى بار ادامدار ءۇشىن قولجەتىمدىلىكتىڭ بولماۋى فاكتىسى بويىنشا جەرگىلىكتى دۇكەنگە جوسپاردان تىس تەكسەرۋ جۇرگىزىلدى. تەكسەرۋ قورىتىندىسى بويىنشا سۋبەكت ايىپپۇل تۇرىندە اكىمشىلىك جاۋاپكەرشىلىككە تارتىلدى، سونداي-اق انىقتالعان بۇزۋشىلىقتاردى جويۋ تۋرالى نۇسقاما ەنگىزىلدى.
بۇل رەتتە الەۋمەتتىك ينسپەكتورلار بارلىق وڭىرلەردە مۇگەدەكتىگى بار ادامدار ءۇشىن الەۋمەتتىك ينفراقۇرىلىمدى بەيىمدەۋدەگى وڭ وزگەرىستەر ورىن الىپ جاتقانىن ايتۋدا. مۇنى ەرەكشە قاجەتتىلىكتەرى بار ادامدار دا راستايدى.
«سوڭعى ۋاقىتتا قاراعاندى قالاسىندا، ونىڭ ىشىندە ءاليحان بوكەيحان اۋدانىندا مۇگەدەكتىگى بار ادامدار ءۇشىن الەۋمەتتىك ينفراقۇرىلىمدى بەيىمدەۋدە العا جىلجۋ بايقالادى. قالا بىرتىندەپ مۇگەدەكتىگى بار ادامدار ءۇشىن قول جەتىمدى بولا باستادى: ينفراقۇرىلىم جاقسارۋدا، كوپتەگەن عيماراتتار پاندۋستارمەن جانە بەيىمدەلگەن كىرەبەرىستەرمەن جابدىقتالعان. وعان مىسال رەتىندە گەنناديي گولوۆكين اتىنداعى دەنە شىنىقتىرۋ-ساۋىقتىرۋ كەشەنىن ايتۋعا بولادى، وندا كىرەبەرىس جابدىقتالعان، ليفت ورناتىلعان، سونىڭ ناتيجەسىندە مۇگەدەكتىگى بار ازاماتتارعا سپورتپەن شۇعىلدانۋعا كوبىرەك ورىن ءبولىندى. ارينە، ءالى دە ءبىرقاتار جۇمىستار جاساۋ قاجەت، ءبىراق وڭ وزگەرىستەر ءقازىردىڭ وزىندە بايقالادى ءارى الداعى ۋاقىتتا قول جەتىمدى ورتا قالىپتى جاعدايعا اينالاتىنىنا سەنەمىن»، – دەپ اتاپ ءوتتى قاراعاندى قالاسىنىڭ تۇرعىنى، ەكىنشى توپ مۇگەدەكتىگى بار ازامات سەرگەي حارچەنكو.