قازاقستان رەسپۋبليكاسى پرەزيدەنتىنىڭ جارلىعىمەن ەلدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى ءۇشىن ءبىرقاتار ازامات مەملەكەتتىك ناگرادالارمەن ماراپاتتالدى. ولاردىڭ قاتارىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورلارى ايناگۇل ەرشينا مەن دينا ابدىكادىروۆا بار، دەپ حابارلايدى aqshamnews.kz.
ايناگۇل قاپاس قىزى ەرشينا – فيزيكا-ماتەماتيكا عىلىمدارىنىڭ دوكتورى، پروفەسسور. جارتى عاسىرعا جۋىق عىلىمي-پەداگوگيكالىق قىزمەتىندە جىلۋفيزيكا، گيدرواەرومەحانيكا سالالارى بويىنشا زەرتتەۋلەر جۇرگىزىپ، جەل تۋربينالارىنىڭ اەروديناميكالىق سيپاتتامالارىن جەتىلدىرۋگە ەلەۋلى ۇلەس قوستى. 150-دەن استام عىلىمي ماقالانىڭ، بىرنەشە وقۋلىق پەن ونەرتابىسقا پاتەنتتىڭ اۆتورى. عىلىمي ەڭبەكتەرى Scopus بازاسىندا يندەكستەلگەن.
پروفەسسور ق ر پرەزيدەنتىنىڭ حالىقارالىق «بولاشاق» ستيپەندياسىنىڭ يەگەرى. سونداي-اق، ق.ي. ساتبايەۆ اتىنداعى ءى سىيلىقتىڭ، «قازاقستان عىلىمىن دامىتۋعا سىڭىرگەن ەڭبەگى ءۇشىن» توسبەلگىسىنىڭ، «ۇلاعات» كۇمىس مەدالىنىڭ يەگەرى. 2024 جىلى ق ر ۇلتتىق عىلىم اكادەمياسىنىڭ قۇرمەت گراموتاسىمەن ماراپاتتالدى.
دينا راحيموۆنا ابدىكادىروۆا – پەداگوگيكا عىلىمدارىنىڭ كانديداتى، پروفەسسور، 50 جىلدان استام ەڭبەك ءوتىلى بار تاجىريبەلى مامان. ول دەنە شىنىقتىرۋ جانە سپورت سالاسىندا 50-دەن استام عىلىمي ماقالا مەن ادىستەمەلىك قۇرالدار ازىرلەدى. ۇزاق جىلدار QyzPU دەنە شىنىقتىرۋ جانە سپورت كافەدراسىن باسقارىپ، ازيا، الەم جانە وليمپيادا چەمپيوندارىن تاربيەلەدى.
عىلىم مەن بىلىمگە سىڭىرگەن ەڭبەگى ءۇشىن «ى. التىنسارين» توسبەلگىسىمەن، «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» بەلگىسىمەن، «قۇرمەت بەلگىسى» مەدالىمەن ماراپاتتالعان. 2002 جىلى حالىقارالىق عىلىمي-پەداگوگيكالىق ءبىلىم اكادەمياسىنىڭ كوررەسپوندەنت-مۇشەسى، ال 2009 جىلى QyzPU اكادەميالىق پروفەسسورى اتاندى.
QyzPU پروفەسسورلارىن مەملەكەتتىك ماراپاتپەن قۇتتىقتايمىز! ەڭبەكتەرىڭىز ەلەنە بەرسىن، ابىرويلارىڭىز ارتا بەرسىن!