قازاقستاندا 28 قىركۇيەك كۇنى اتوم سالاسى قىزمەتكەرلەرىنىڭ كۇنى اتاپ وتىلەدى. اتوم ونەركاسىبى قىزمەتكەرلەرىنىڭ كاسىبي مەرەكەسىن بەكىتۋ تۋرالى جارلىققا ق ر پرەزيدەنتى 2008 جىلعى 12 مامىردا قول قويدى. بۇل شەشىم قازاقستان رەسپۋبليكاسىنىڭ 2001 جىلعى 13 جەلتوقسانداعى «قازاقستان رەسپۋبليكاسىنداعى مەرەكەلەر تۋرالى» زاڭىنىڭ 4-بابىنا سايكەس قابىلدانعان، دەپ حابارلايدى aqshamnews.kz
اتوم سالاسى قىزمەتكەرلەرىنىڭ كاسىبي مەرەكەسىنىڭ قازاقستاندىق مەرەكەلەر كۇنتىزبەسىنە ەنگىزىلۋى اتوم ونەركاسىبىنىڭ ەلدىڭ ەكونوميكالىق دامۋىنداعى ماڭىزدى ءرولىن كورسەتەدى. بۇگىنگى تاڭدا اتوم ونەركاسىبى قازاقستاندا ەڭ جوعارى تەحنولوگيالىق، عىلىمدى قاجەت ەتەتىن جانە تابىستى سالالاردىڭ ءبىرى بولىپ تابىلادى.
مەملەكەت باسشىسى قاسىم-جومارت توقايەۆ ءوز جولداۋىندا بەيبىت اتومنىڭ جاھاندىق تاجىريبەگە سۇيەنە وتىرىپ، ەڭ وڭتايلى شەشىم ەكەنىن اتاپ ءوتتى. بۇل ماسەلە كۇردەلى بولعاندىقتان، ونى شەشۋ كەزىندە بارىنشا سالماقتى، بولجامسىز جانە ەموسياسىز قاراۋ قاجەت.
پرەزيدەنت قازاقستاندا ءقاۋىپسىز جانە ەكولوگيالىق تازا اتوم ەنەرگەتيكاسىن دامىتۋ مۇمكىندىگىن زەرتتەۋدى ءبىر جىل ىشىندە تاپسىردى. مەملەكەت باسشىسىنىڭ ايتۋىنشا، بۇل ماسەلە ينجەنەريانى دامىتۋ، جاڭا بۋىن بىلىكتى اتوم ينجەنەرى ماماندارىن قالىپتاستىرۋ تۇرعىسىنان دا قاراستىرىلۋى ءتيىس.
اتوم ونەركاسىبىن دامىتۋ تۋرالى ايتقاندا، ەلىمىزدە اتوم ەلەكتر ستانسياسىن سالۋ ماسەلەسىن ەسكەرمەۋ مۇمكىن ەمەس. بۇل تاقىرىپ قازاقستاندىق قوعامدا 20 جىلدان استام ۋاقىت بويى وزەكتىلىگىن جوعالتقان جوق. قازاقستانعا اتوم ەلەكتر ستانسياسى قاجەت پە دەگەن سۇراق كوپتەگەن ازاماتتاردى الاڭداتادى، دەگەنمەن ءالى ناقتى جاۋاپ جوق.
ايتا كەتەيىك، جاقىندا ۆەنا قالاسىندا حالىقارالىق اتوم ەنەرگياسى اگەنتتىگىنىڭ (ماگاتە) 65ء-شى جىل سايىنعى باس كونفەرەنسياسىنىڭ سەسسياسى ءوتتى. بۇل ءىس-شاراعا قازاقستان وكىلدەرى دە قاتىستى.
ماگاتە – بۇۇ جۇيەسىنىڭ حالىقارالىق ۇيىمى، «بەيبىتشىلىك جانە دامۋ ءۇشىن اتوم» ۇرانىمەن جۇمىس ىستەيدى. بۇل ۇيىم يادرولىق سالاداعى حالىقارالىق ىنتىماقتاستىق ورتالىعى رەتىندە ارەكەت ەتەدى. ءوزىنىڭ مەملەكەتتەر-مۇشەلەرىمەن جانە الەمدەگى كوپتەگەن سەرىكتەستەرىمەن بىرلەسە وتىرىپ، اگەنتتىك يادرولىق تەحنولوگيالاردى ءقاۋىپسىز، سەنىمدى جانە بەيبىت ماقساتتا قولدانۋعا جاردەمدەسەدى.