«جىبەك جولىنىڭ ءىنجۋ-مارجانى» XIV تاشكەنت حالىقارالىق كينوفەستيۆالى اياسىندا وتەتىن قازاقستان كينوسى كۇندەرى 2022 جىلعى جاڭا «پاراليمپياداشى» كوركەم فيلمىمەن اشىلادى، دەپ حابارلايدى Almaty-akshamy.kz Inform.kz-كە سىلتەمە جاساپ.
كينوفەستيۆال ۇيىمداستىرۋشىلارىنىڭ ايتۋىنشا، كينوكارتينا 13 قىركۇيەك كۇنى تاشكەنتتەگى مۋكيمي اتىنداعى مۋزىكالىق دراما جانە كومەديا تەاترىندا كورەرمەنگە جول تارتادى.
رەجيسسەر الديار بايراقىموۆتىڭ «پاراليمپياداشى» ءفيلمىنىڭ سيۋجەتى وليمپيادا ويىندارىنىڭ التىنىن ارمانداپ، جول اپاتىنا ءتۇسىپ، اياعىنان ايرىلعان شاڭعىشى ماقسات تۋرالى باياندايدى. ۇزاق ۋاقىت كۇيزەلىسكە تۇسكەن ماقسات سپورتقا قايتا ورالۋدى شەشەدى.
بۇعان دەيىن تاشكەنتتەگى حالىقارالىق كينوفەستيۆالدىڭ قۇرمەتتى قوناقتارى تاكەشي كيتانو، ارماند اسسانتە، بۋراك وزچيەۆيت، سەرگەي بەزرۋكوۆ، دجونني دەپپ (ونلاين)، تيمۋر بەكمامبەتوۆ جانە باسقا دا كوپتەگەن الەمدىك كينولاردىڭ مايتالماندارى بولاتىنى حابارلانعان.
تاشكەنت كينوفەستيۆالى، سونىمەن قاتار ازيا، افريكا جانە لاتىن امەريكاسى ەلدەرىنىڭ حالىقارالىق كينوفەستيۆالى رەتىندە بەلگىلى، ءداستۇرلى تۇردە وزبەكستان استاناسىندا 1968 جىلدان 1997 جىلعا دەيىن ءوتتى. «جىبەك جولىنىڭ ءىنجۋ-مارجانى» كينوفەستيۆالى 2021 جىلى وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆتىڭ باستاماسىمەن قايتا جاندانىپ، جىل سايىن وتكىزىلىپ كەلەدى.