اللەرگيا – بۇل ۇكىم ەمەس، اعزانىڭ ءتيىمسىز يممۋندىق جاۋابى عانا، ونى جەڭۋگە بولادى.
بۇگىندە الماتىدا اللەرگيالىق اۋرۋلاردى دياگنوستيكالاۋدىڭ جانە ەمدەۋدىڭ زاماناۋي ادىستەرىنىڭ بارلىعى قولجەتىمدى، سونىڭ ىشىندە اللەرگەنگە سپەسيفيكالىق يممۋنوتەراپيا (اسيت) دا بار. بۇل تۋرالى الماتى قالاسىنىڭ باس اللەرگولوگى تاير نۋرپەيسوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ايتتى، دەپ حابارلايدى aqshamnews.kz.
«كەز كەلگەن اللەرگيالىق اۋرۋدى ەمدەۋگە بولادى. ءتىپتى اللەرگيانىڭ ءوزىن دە تولىقتاي ەمدەۋگە بولادى. الماتىدا اللەرگيانىڭ نەگىزگى سەبەبىن ەمدەۋگە باعىتتالعان اسيت ادىسىنە ارنالعان زاماناۋي، ءتيىمدى ءارى ءقاۋىپسىز پرەپاراتتار قولدانىلادى – بۇل وسى سالاداعى «التىن ستاندارت» بولىپ سانالادى»، – دەپ اتاپ ءوتتى ول.
ونىڭ ايتۋىنشا، اسيت اعزانىڭ اللەرگەندەرگە سەزىمتالدىعىن تومەندەتىپ، ۋاقىت وتە كەلە سەنسيبيليزاسيادان تولىق ارىلۋعا مۇمكىندىك بەرەدى. بۇل تەراپيا ءار ادامعا جەكە تاڭدالادى جانە بالالارعا دا، ەرەسەكتەرگە دە جۇرگىزىلۋى مۇمكىن.
نۋرپەيسوۆ اللەرگيانى انىقتاۋ بۇرىنعىدان الدەقايدا قولجەتىمدى بولعانىن دا اتاپ ءوتتى: تەرىلىك سىنامالار، زەرتحانالىق تالداۋلار، وتاندىق جانە شەتەلدىك ادىستەر – مۇنىڭ ءبارى بۇگىندە كوپتەگەن مەديسينالىق ورتالىقتار مەن زەرتحانالاردا قولدانىلادى، ولاردىڭ باسىم بولىگى ءمامس جۇيەسى ارقىلى قىزمەت كورسەتەدى. كەيبىر جاعدايلاردا اللەرگيا ءتىپتى سابيلەر مەن ەگدە جاستاعى ادامداردا دا انىقتالۋى مۇمكىن، الايدا دۇرىس ءتاسىل قولدانىلسا، كەز كەلگەن جاستا دياگنوستيكا جاساۋعا بولادى.
«اللەرگيا – بۇل يممۋنيتەتتىڭ ءبىر بولىگى. سوندىقتان دۇرىس تاماقتانۋ، بەلسەندى ءومىر سالتى، سپورت – مۇنىڭ ءبارى الدىن الۋدا ۇلكەن ءرول اتقارادى. ءتىپتى تىنىس دەمىكپەسى كەزىندە دە بەلسەندىلىكتەن باس تارتۋعا بولمايدى. كوپتەگەن كاسىبي سپورتشىلار بالا كۇنىندە دەمىكپەمەن اۋىرعان»، – دەپ قوستى نۋرپەيسوۆ.
قورىتىندىلاي كەلە، ول الماتىلىقتارعا بىرنەشە قاراپايىم، ءبىراق ماڭىزدى كەڭەس بەردى: بالالارعا ستەريلدى جاعداي جاساماۋ، ءوز بەتىنشە ەمدەلمەۋ، توزاڭ ماۋسىمىندا سەرۋەندەۋدە ماسكا تاعۋ، وزىڭىزگە لايىق سپورت ءتۇرىن تاڭداۋ جانە ماماندارعا جۇگىنۋدەن قورىقپاۋ.