كوكتەمنىڭ كەلۋىمەن الماتىدا وسىمدىكتەردىڭ گۇلدەۋ ماۋسىمى باستالادى، بۇل اللەرگياسى بار ادامداردىڭ دەنساۋلىعىنا ايتارلىقتاي اسەر ەتەدى. الايدا ۋاقتىلى دياگنوستيكا مەن دۇرىس جۇرگىزىلگەن پروفيلاكتيكالىق شارالار قالا تۇرعىندارىنا تولىققاندى ءومىر سۇرۋگە مۇمكىندىك بەرەدى. بۇل جونىندە الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ باس اللەرگولوگ-يممۋنولوگى، مەديسينا عىلىمدارىنىڭ دوكتورى تاير نۋرپەيسوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا مالىمدەدى، دەپ حابارلايدى aqshamnews.kz.
ونىڭ ايتۋىنشا، كوكتەم-جاز مەزگىلىندە ەڭ بەلسەندى اللەرگەندەر – اعاشتاردىڭ توزاڭى مەن مامىعى، اتاپ ايتقاندا، تەرەك، قايىڭ، قاراعاش، جوكە، سونداي-اق كەڭ تارالعان تيموفەيەۆكانى قوسا العاندا، شابىندىق شوپتەر بولىپ تابىلادى. كەيىنىرەك، شىلدە-تامىز ايلارىندا، ارامشوپتەردىڭ – جۋسان، امبروزيا جانە باسقا دا وسىمدىكتەردىڭ گۇلدەۋ ماۋسىمى باستالادى.
«الماتىدا اعاش تۇرلەرى وتە كوپ، ءتىپتى سيرەك جەمىس بەرەتىن، ءبىراق سوعان قاراماستان توزاڭ بولەتىن سۋبتروپيكالىق تۇرلەرى دە بار. اۋاداعى توزاڭ كونسەنتراسياسى كەي جاعدايدا، اسىرەسە قۇرعاق ءارى جەلدى كۇندەرى، ايتارلىقتاي جوعارى بولۋى مۇمكىن»، – دەپ اتاپ ءوتتى مامان.
سونىمەن قاتار، ول اللەرگيانى تەك توزاڭ عانا ەمەس، جىل بويى اسەر ەتەتىن تىتىركەندىرگىشتەر دە قوزدىرۋى مۇمكىن ەكەنىن ايتتى. ولارعا ءۇي شاڭى، زەڭ، ءۇي جانۋارلارىنىڭ تەرى بولشەكتەرى جاتادى. سوندىقتان دەر كەزىندە اللەرگولوگ-دارىگەرگە قارالىپ، ءوز بەتىنشە ەمدەلمەۋ ماڭىزدى.
سونداي-اق، نۋرپەيسوۆ اللەرگيا بەلگىلەرىن جاي سۋىق تيۋ نەمەسە جرۆي-دەن قالاي اجىراتۋعا بولاتىنىن ءتۇسىندىردى. ماۋسىمدىق اللەرگيا كەزىندە كوبىنە كوزدىڭ قىشۋى، تۇشكىرۋ، دەنە قىزۋىنسىز مۇرىننان سۋ اعۋى جانە جىل سايىن قايتالاناتىن بەلگىلەر بايقالادى. ال ۆيرۋستىق ينفەكسيالار السىزدىك، دەنە قىزۋى جانە بۇلشىقەت اۋىرسىنۋىمەن قاتار جۇرەدى. دەگەنمەن، ونىڭ ايتۋىنشا، كەز كەلگەن جاعدايدا زاماناۋي انتيگيستاميندىك پرەپاراتتاردى قابىلداۋدان باستاۋ كەرەك – ولار جرۆي كەزىندە دە، اللەرگيالىق رينيت كەزىندە دە ءتيىمدى.
«مەن ءوز پاسيەنتتەرىمە ەمدەۋدى ءارقاشان اللەرگياعا قارسى قۇرالداردان باستاۋدى ۇسىنامىن. اسىرەسە، دەنە قىزۋى 38.5 ° C-تان تومەن بولسا، ونى تومەندەتپەۋ ماڭىزدى»، - دەپ اتاپ ءوتتى ساراپشى.