قولايسىز بولىپ وتىر.
قازاقستاننىڭ ۇلتتىق بانكىنىڭ ءتوراعاسى عالىمجان ءپىرماتوۆ قازاقستان ءۇشىن سىرتقى ينفلياسيالىق جاعداي نەلىكتەن قولايسىز بولاتىنىن ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل ماكروەكونوميكالىق احۋال گەوساياسي جاعدايدىڭ ناشارلاۋى مەن الەمدىك قارجى، تاۋار نارىعىنداعى قۇبىلمالىقتىڭ ارتۋى اياسىندا دامىپ جاتىر. گەوساياسي شيەلەنىستەن تاۋار جەتكىزۋ پروبلەمالارى كۇردەلەنىپ، الەمدە ينفلياسيالىق قىسىم كۇشەيىپ كەلەدى. وسىعان بايلانىستى حالىقارالىق ۆاليۋتا قورى جاھاندىق ينفلياسيانىڭ جوعارى دەڭگەيى الدىڭعى بولجاممەن سالىستىرعاندا ۇزاعىراق ساقتالادى دەپ كۇتەدى»، - دەدى عالىمجان ءپىرماتوۆ سەنات وتىرىسىندا.
بىرىككەن ۇلتتار ۇيىمى قاداعالايتىن الەمدەگى ازىق-تۇلىك باعاسى يندەكسى 1990 جىلدان باستاپ ەڭ جوعارى كورسەتكىشكە جەتتى.
ازىق-تۇلىكتىڭ الەمدىك باعاسى 2022 جىلى دا، 2023 جىلى دا جوعارى دەڭگەيدە قالادى دەپ كۇتىلىپ وتىر.
«ازىق-تۇلىك، شيكىزات، جانار-جاعار ماي، گاز باعاسىنىڭ قىمباتتاۋىنان ەۋرووداق پەن اقش-تاعى ينفلياسيا كوپ جىلدىق رەكوردتى كورسەتىپ وتىر، ال رەسەيدە ينفلياسيا 16،7%-عا جەتتى. مۇنداي جاعدايدا دامىعان ەلدەر اقشا-كرەديت تالاپتارىن كۇشەيتەدى، بۇل دامۋشى ەلدەردىڭ ۆاليۋتالارىنا قىسىم جاسايدى. وسىعان بايلانىستى قازاقستان ءۇشىن سىرتقى ينفلياسيالىق جاعداي قولايسىز بولىپ قالىپتاسىپ وتىر»، - دەدى ۇلتتىق بانك ءتوراعاسى.